پشاور سے موصولہ رپورٹ کے مطابق سینئر ٹیلی ویژن فنکار اور پرائیڈ آف پرفارمنس ایوارڈ یافتہ نجیب اللہ انجم نے حکومت کی جانب سے فنکاروں کو وزیراعظم صحت کارڈ جاری کرنے کے دعوے پر شدید تحفظات کا اظہار کیا ہے۔
ان کا کہنا ہے کہ چند ماہ قبل خیبرپختونخوا کے سینئر فنکاروں کو پشاور ٹی وی کی انتظامیہ کے ذریعے یہ کارڈ دیے گئے تھے اور بتایا گیا تھا کہ یہ وفاقی حکومت کی جانب سے ان کی فنی خدمات کے اعتراف میں دیے جا رہے ہیں تاکہ انہیں علاج معالجے کی سہولت مل سکے۔
تاہم نجیب اللہ انجم کے مطابق یہ کارڈ تاحال فعال نہیں ہیں اور نہ ہی ان کے استعمال کے حوالے سے کوئی واضح معلومات فراہم کی گئی ہیں۔ ان کا کہنا ہے کہ فنکاروں کے ساتھ اس طرح کا رویہ قابل افسوس ہے اور یہ ایک غیر سنجیدہ اقدام ہے۔
انہوں نے حکومت سے مطالبہ کیا کہ فنکار برادری کو سنجیدگی سے لیا جائے کیونکہ یہ طبقہ نہ صرف حساس ہے بلکہ ملک سے گہری محبت بھی رکھتا ہے۔ ان کے مطابق ایسے اقدامات سے فنکاروں میں مایوسی بڑھ رہی ہے۔
