بلوچستان میں طوفانی بارشوں سے ندی نالے بپھر گئے ہیں، جبکہ اس کے ساتھ ہی گوادر اور مکران کا کراچی سے رابطہ منقطع ہوگیا ہے
بلوچستان میں محکمہ موسمیات کے مطابق 24گھنٹوں کے دوران گوادر میں 80 ملی میٹر بارش ریکارڈ کی گئی جبکہ اس کے علاوہ اورماڑہ میں77، پسنی میں 66، جیوانی میں 40 ملی میٹر بارش ریکارڈ کی گئی۔ بارشوں کا سلسلہ گوادر، پسنی، نوشکی، نوکنڈی اور بارکھان میں جاری ہے جس کی وجہ سے نشیبی علاقے زیر آب آ گئے ہیں، کوئیک رسپانس ٹیمیں اور سول انتظامیہ امدادی کارروائیوں میں مصروف ہے، فصلوں اور باغات کو بھی سیلابی صورتحال کے باعث نقصان پہنچا ہے۔
پی ڈی ایم اے کے مطابق سیلاب کی وجہ سے مکران کوسٹل ہائی وے پر بسول ندی کا پُل ٹوٹ گیا جس کے باعث 2 مقامات سے ہائی وے بند ہوگئی، گوادر اور مکران کا کراچی سے زمینی رابطہ منقطع ہوگیا، اورسیلابی صورتحال ماڑہ کے دیہی علاقوں میں بھی ہے، قلات، مستونگ، نوشکی اور ژوب میں بھی نشیبی علاقے ڈوب گئے۔
چیف میٹرولوجسٹ سردار سرفراز کے مطابق بارش کا سلسلہ بلوچستان کے مختلف علاقوں میں جاری ہے، ساحلی علاقوں سے شدید بارش کی رپورٹ آ رہی ہے، بلوچستان سے سسٹم پنجاب اور خیبرپختونخوا میں داخل ہو رہا ہے جس کے باعث خیبر پختونخوا اور پنجاب کے مختلف علاقوں میں بھی تیز بارش کا امکان ہے۔محکمہ موسمیات کے مطابق مغربی ہواؤں کا سلسلہ بلوچستان کے مختلف اضلاع میں موجود ہے جبکہ آج بھی کوئٹہ اور گردونواح میں مطلع ابر آلود ہے، چند مقامات پر جھکڑ چلنے اور گرج چمک کے ساتھ موسلادھار بارش ہو سکتی ہے۔
