اسلام آباد: وزیر دفاع خواجہ آصف نے واضح کیا ہے کہ وفاقی حکومت خیبر پختونخوا کے وزیراعلیٰ اور گورنر کو افغانستان سے آزادانہ ڈیل کی اجازت نہیں دے گی ۔
اپنے ایک بیان میں وفاقی وزیر خواجہ آصف نے کہا کہ دفاع اور خارجہ امور کا معاملہ آئین میں بہت واضح ہے، قانونی و آئینی طور پر افغانستان سے بات چیت کا معاملہ وفاق کا ہے، وزیراعلیٰ اور گورنر خیبر پختونخوا کو افغانستان سے آزادانہ ڈیل کی اجازت نہیں دیں گے ۔
خواجہ آصف کا کہنا تھا اگر خیبرپختونخوا حکومت چاہتی ہے کہ افغانستان سے آزادانہ طور پر ڈیل کریں تو وفاق اجازت نہیں دے گا، ایسے عمل کی نہ کوئی قانون اور نہ آئین اجازت دے گا، کوئی اپنی رائے کو وفاق پر مسلط نہیں کر سکتا ۔
وزیر دفاع کا مزید کہنا تھا کہ وزیراعلیٰ اور گورنر خیبرپختونخوا اگر کوئی رائے دینا چاہتے ہیں تو اجلاسوں میں آکر اپنی رائے اور موقف ضرور دیں، وفاقی حکومت کو آکر بتائیں کہ ان کے نزدیک اس مسئلے کا کیا حل ہو سکتا ہے ۔
