وزیر اعلیٰ پنجاب آئی ٹی منصوبوں کی بروقت تکمیل کے لیے کوشاں، صوبہ کے 50 لاکھ طلبہ کو ٹریننگ فراہم کی جائے گی، انوشہ رحمان

وزیر اعلیٰ پنجاب کی سینئر ایڈوائزر سینیٹر انوشہ رحمان نے کہا ہے کہ حکومت انفارمیشن ٹیکنالوجی کے فروغ کےلئے ٹھوس اقدامات بروئے کار لا رہی ہے، پائیدار ترقی کےلئے فرنٹیئر ٹیکنالوجی کو اپنانا ناگزیرہے، صوبے کے 50 لاکھ طلبہ کو فر نٹئیر ٹیکنالوجیز پر ٹریننگ فراہم کی جائے گی، وزیر اعلی ٰمریم نواز آئی ٹی منصوبوں کی بروقت تکمیل کےلئے دن رات کوشاں ہیں۔ ان خیالات کا اظہار انہوں نے آئی ٹی کے حوالے سے منعقدہ اجلاس کی صدارت کرتے ہوئے کیا۔
اس موقع پر سیکرٹری انفارمیشن ٹیکنالوجی ظہیر حسن، صدر نیشنل انکیوبیشن سنٹر لاہور (این آئی سی ایل) ایوب غوری، پراجیکٹ ڈائریکٹر این آئی سی ایل آغا عبد الرحمٰن اور پرنسپل ایڈوائزر این آئی سی ایل سعد طارق موجود تھے جبکہ مختلف آئی ٹی انڈسٹریز کے سربراہا جن میں جیز کیش، ہوائی اور وینچر کیپٹیل فنڈز کے سربراہان بھی شامل تھے۔
اجلاس میں فرنٹیئر ٹیکنالوجی، انکیوبیشن سینٹرز اور ڈیجیٹل سکل ڈیویلپمنٹ سمیت دیگر آئی ٹی سیکٹر میں ترقیاتی منصوبوں کے پراجیکٹس اور مختلف تجاویز و عملی اقدامات پر غور کیا گیا۔ سینٹر انوشہ رحمان نے کہا کہ اس اجلاس کا مقصد حکومت، انڈسٹری، اکیڈمیہ اور دیگر سٹیک ہولڈرز کے ساتھ مل کر پنجاب کی آئی ٹی پالیسی پر کام کرنا اور گول سیٹ کرنا ہے۔
انہوں نے کہا کہ مستقبل میں فرنٹیئر ٹیکنالوجی کو اپنانا کسی بھی ملک کے لیے پائیدار ترقی اور مستقبل کی ضروریات سے ہم آہنگ ہونے کے لیے ناگزیر ہو چکا ہے، ہمیں بھی ڈیجیٹل معیشت کے فروغ، ای کامرس، فِن ٹیک اور ڈیجیٹل خدمات کے ذریعے معیشت کو فروغ دینا ہو گا۔