دوست ممالک کے سفارتی وفود کا این ڈی ایم اے ہیڈکوارٹرز کا دورہ، جدید نظام پر بریفنگ

دوست ممالک کے سفارتی وفود نےاسلام آباد میں نیشنل ڈیزاسٹر مینجمنٹ اتھارٹی کے ہیڈکوارٹرز کا دورہ کیا، وفد کو نیشنل ایمرجنسی آپریشن سینٹر کی جدید صلاحیتوں اور نظام پر تفصیلی بریفنگ دی گئی۔
چیئرمین این ڈی ایم اے لیفٹیننٹ جنرل انعام حیدر ملک نے وفد کو پاکستان کے پیشگی اقدامات پر مبنی آفات سے نمٹنے کے نظام سے آگاہ کیا۔ بریفنگ میں بتایا گیا کہ این ای او سی موسمی تبدیلیوں کے تناظر میں ممکنہ خطرات اور قدرتی آفات کے حوالے سے چھ ماہ قبل پیشگی انتباہ دینے کی صلاحیت رکھتا ہے۔
وفد کو ’لینز پاکستان 2026‘ اور ’گلوبل ڈیزاسٹر لینز 2026‘ کے ذریعے قومی او رعالمی سطح پر موسمی رجحانات اور ممکنہ خطرات کے تجزیے سے بھی آگاہ کیا گیا۔مہمانوں کو بتایا گیا کہ ڈیجیٹل پورٹلز، موبائل ایپلیکیشنز اور جدید ماڈلز کے ذریعے نہ صرف پاکستان بلکہ دوست ممالک کو بھی بروقت معلومات فراہم کی جا رہی ہیں۔
اجلاس میں آن لائن شرکاء سمیت 65 ممالک کے نمائندگان نے شرکت کی۔سفارتی وفود نے پاکستان کے جدید اور مربوط آفات سے نمٹنے کے نظام کو سراہتے ہوئے علاقائی اور عالمی تعاون کے فروغ میں دلچسپی کا اظہار کرتے ہوئے مشترکہ اقدامات کے عزم کا اعادہ کیا۔