بلوچستان میں جاری پٹرول بحران کسی تکنیکی خرابی کا نتیجہ نہیں، بلکہ اسمگلنگ مافیا، مفاد پرست پمپ مالکان اور ریاست مخالف عناصر کی ملی بھگت سے پیدا ہونے والا ایک مصنوعی بحران ہے۔ عوام کو اصل حقائق سے آگاہ کرنا ضروری ہے تاکہ جھوٹے پراپیگنڈے اور بلیک میلنگ کا مؤثر جواب دیا جا سکے۔
پمپ مالکان اور اسمگلروں کی ملی بھگت
وہ پمپ مالکان جو سالہا سال سے ایرانی تیل کی اسمگلنگ سے منافع کما رہے تھے، اب ریاستی اقدامات کے خلاف منظم سازش کر رہے ہیں۔ جیسے ہی حکومت نے اسمگلنگ کے خلاف کارروائی کی، ان عناصر نے پٹرول کی قلت کا ڈھونگ رچایا اور عوام کو بلیک میل کرنے کی کوشش شروع کر دی۔
تیل کی قلت نہیں، نیت کا بحران ہے
حکومت کی جانب سے تیل کی مسلسل فراہمی جاری ہے اور آئل مارکیٹنگ کمپنیوں کے ڈپوز میں وافر مقدار میں تیل موجود ہے۔ مگر مقامی پمپ مالکان مہنگے داموں پر غیر معیاری ایرانی تیل ملا کر اپنی ٹینکیاں بھر رہے ہیں تاکہ ناجائز منافع دوگنا کیا جا سکے۔
حکومت کے خلاف بلیک میلنگ کی مہم
یہ عناصر حکومتی اقدامات کو عوام دشمن قرار دے کر سوشل میڈیا پر منفی پروپیگنڈا پھیلا رہے ہیں۔ عوام کو ذہنی اذیت میں مبتلا کر کے، یہ اپنے غیر قانونی کاروبار کو جاری رکھنا چاہتے ہیں۔
اسمگلنگ کے خلاف اقدامات پر مصنوعی احتجاج
ایرانی تیل کی غیر قانونی ترسیل رکنے کے بعد اسمگلنگ مافیا دباؤ کا شکار ہے۔ اب یہی مافیا احتجاج، ہڑتال اور بحران کا ڈرامہ رچا کر ریاستی رٹ کو چیلنج کر رہا ہے۔
عوامی خیرخواہی کا جھوٹا دعویٰ
جو لوگ خود کو عوام کا ہمدرد ظاہر کر رہے ہیں، درحقیقت وہ اپنے ذخیرے بچانے، غیر قانونی آمدنی جاری رکھنے اور ریاستی اقدامات کو ناکام بنانے کی کوشش میں مصروف ہیں۔
صورتحال قابو میں، جلد معمول پر آجائے گی
ضلعی اور وفاقی ادارے مسلسل رابطے میں ہیں، تیل کا کوٹہ بڑھا دیا گیا ہے اور اسمگلنگ پر کڑی نگرانی جاری ہے۔ چند دنوں میں پٹرول کی فراہمی معمول پر آ جائے گی۔
سوشل میڈیا پر جھوٹے پراپیگنڈے سے ہوشیار رہیں
جعلی ویڈیوز، پرانی تصاویر اور من گھڑت خبروں کے ذریعے خوف پھیلایا جا رہا ہے۔ عوام کو چاہیے کہ صرف مصدقہ ذرائع سے ہی معلومات حاصل کریں۔
ریاستی رٹ پر کوئی سمجھوتہ نہیں ہوگا
اسمگلنگ مافیا اور مفاد پرست عناصر کو خبردار کیا جاتا ہے کہ ریاستی رٹ پر حملے برداشت نہیں کیے جائیں گے۔ عوامی مسائل کو ہتھیار بنا کر فساد پھیلانے والوں کے خلاف قانون حرکت میں آئے گا اور کسی کو رعایت نہیں دی جائے گی۔
