اسلام آباد: وفاقی وزیر خزانہ سینیٹر محمد اورنگزیب سے پاکستان کاٹن جنرز ایسوسی ایشن کے وفد نے چیئرمین شام لال منگلانی کی قیادت میں ملاقات کی۔
اس ملاقات میں کپاس کے شعبے کو درپیش مسائل اور اس کی ترقی کے لیے مختلف تجاویز پر تبادلہ خیال کیا گیا۔
ملاقات میں کپاس کی ویلیو چین، کاشتکاروں اور جنرز کو درپیش چیلنجز، پیداواری صلاحیت میں اضافے اور سرمایہ کاری کے فروغ سے متعلق امور زیرِ غور آئے۔
وفد نے کپاس کو ملکی معیشت، ٹیکسٹائل صنعت، برآمدات اور دیہی روزگار کے لیے انتہائی اہم قرار دیتے ہوئے ٹیکس نظام اور دستاویزی معیشت کے فروغ سے متعلق تجاویز بھی پیش کیں۔
وزیر خزانہ نے کہا کہ حکومت زرعی اور صنعتی شعبوں کی پائیدار ترقی کے لیے سازگار کاروباری ماحول فراہم کرنے کے لیے پُرعزم ہے۔
انہوں نے یقین دہانی کرائی کہ ایسوسی ایشن کی سفارشات کا جائزہ لیا جائے گا اور کپاس کے شعبے کی بحالی، برآمدات میں اضافے اور روزگار کے مواقع بڑھانے کے لیے صنعت کے ساتھ قریبی تعاون جاری رکھا جائے گا۔
