ڈی سی مری آغا ظہیر عباس شیرازی کی ہدایت پر مری میں تجاوزات کے خلاف بھرپور آپریشن جاری ہے۔ ضلعی انتظامیہ، میونسپل کمیٹی اور متعلقہ اداروں کی مشترکہ ٹیمیں مختلف علاقوں میں کارروائیاں کر رہی ہیں۔
اس آپریشن کے دوران دکانوں کے باہر قائم غیر قانونی شیڈز، تھڑے، ریڑھیاں اور دیگر رکاوٹیں ہٹا دی گئیں جس سے ٹریفک کی روانی بہتر ہوئی اور شہریوں کو آمد و رفت میں آسانی فراہم ہوئی۔
انتظامیہ کی جانب سے دکانداروں کو پہلے ہی نوٹس جاری کیے گئے تھے کہ وہ خود سے تجاوزات ختم کریں بصورت دیگر قانونی کارروائی عمل میں لائی جائے گی۔
ڈپٹی کمشنر نے متعلقہ افسران کو ہدایت کی ہے کہ آپریشن کو بلا امتیاز جاری رکھا جائے اور کسی بھی قسم کی کوتاہی برداشت نہ کی جائے۔ مری کو صاف، خوبصورت اور سیاحوں کے لیے مزید پرکشش بنانے کے لیے ایسے اقدامات تسلسل کے ساتھ جاری رہیں گے۔
