نیشنل ڈیزاسٹر مینجمنٹ اتھارٹی نے مون سون بارشوں کے دوران اب تک جانی و مالی نقصانات کی رپورٹ جاری کردی،رپورٹ کے مطابق ملک بھر میں مون سون کے دوران بارشوں سے جاں بحق ہونے والے افراد کی تعداد 299 ہو گئی ، اس دوران 715 افراد زخمی بھی ہوئے ۔
این ڈی ایم اے کی جانب سے جاری تازہ رپورٹ میں کہا گیا ہے کہ مون سیزن کے دوران 26 جون سے اب تک ہونے والی ہلاکتوں کی تعداد 234 سے بڑھ کر 299 ہوگئی ہے جبکہ اس دوران مختلف حادثات میں 715 افراد زخمی بھی ہوئے ۔
این ڈی ایم اے اعداد و شمار کے مطابق، اس سال کی طوفانی بارشوں اور سیلاب سے جاں بحق ہونےو الوں میں 140 بچے، 102 مرد اور 57 خواتین شامل ہیں،جبکہ زخمیوں میں 239 بچے، 204 خواتین اور 272 مرد شامل ہیں ۔
بارشوں اور سیلاب کے دوران کل 1676 مکانات کو نقصان پہنچا، جن میں سے 562 مکمل طور پر تباہ ہو گئے،بارشوں کے دوران 428 مویشی بھی ہلاک ہو گئے ۔
رپورٹ کے مطابق این ڈی ایم اے نے متاثرہ علاقوں سے 2880 افراد کو ریسکیو اور محفوظ مقام پر منتقل کیا، جبکہ امدادی سرگرمیاں بھی جاری ہیں ۔
رپورٹ کے مطابق این ڈی ایم اے نے 13466 امدادی اشیاء تقسیم کیں، جن میں 1999 خیمے، 61 راشن بیگ، 958 کمبل، 569 رضائیاں، 613 گدے، 1282 کچن سیٹ، 1163 فوڈ پیک، 350 لائف جیکٹس، 1122 حفظانِ صحت کے گھریلو کٹس، 2170 ترپالیں اور 146 پانی نکالنے والی مشینیں شامل ہیں ۔
دوسری جانب محکمہ موسمیات نے آئندہ ہفتے ملک کے بالائی اور وسطی علاقوں میں مزید بارشوں، ہوا اور گرج چمک کے ساتھ طوفان کی پیش گوئی کرتے ہوئے صوبائی و ضلعی ڈیزاسٹر مینجمنٹ اداروں کو شہری سیلاب کے ممکنہ خطرات سے نمٹنے کے لیے پیشگی اقدامات کی ہدایت کی ہے ۔
محکمہ موسمیات کا کہنا ہے کہ 4 اگست سے 7 اگست تک ملک کے شمالی علاقوں میں بارش، تیز ہوائیں اور گرج چمک کے ساتھ موسلادھار بارش متوقع ہے ۔
خیبر پختونخوا، پنجاب اور اسلام آباد میں ان تاریخوں کے دوران بارش ہوگی، جب کہ گلگت بلتستان میں بارش 5 اگست سے شروع ہونے کی توقع ہے ۔
ادھر بلوچستان میں زیادہ تر علاقوں میں موسم گرم اور مرطوب رہے گا، تاہم 6 اگست کو شمال مشرقی اور جنوبی علاقوں میں بارش، ہوا اور گرج چمک کے ساتھ بارش کی پیش گوئی کی گئی ہے ۔
