نائب وزیرِ اعظم و وزیرِ خارجہ سینیٹر محمد اسحٰق ڈار سعودی عرب پہنچ گئے ہیں، اسحاق ڈار اسلامی تعاون تنظیم کی وزرائے خارجہ کونسل کے 21ویں غیرمعمولی اجلاس میں شرکت کریں گے، یہ اہم اجلاس آج جدہ میں او آئی سی سیکریٹریٹ میں منعقد ہو رہا ہے ۔
اسلام آباد: دفتر خارجہ کے مطابق کنگ عبدالعزیز انٹرنیشنل ایئرپورٹ جدہ پرنائب وزیرِ اعظم اور وزیرِ خارجہ کا استقبال پاکستان کے مستقل نمائندہ برائے او آئی سی، سفیر فواد شیر، سعودی عرب میں پاکستان کے سفیر، احمد فاروق اور جدہ میں پاکستان کے قونصل جنرل، خالد مجید نے کیا ۔
او آئی سی اجلاس کے موقع پر اسحٰق ڈار کی اہم رکن ممالک کے وزرائے خارجہ سے ملاقاتیں بھی متوقع ہیں، اس موقع پر فلسطینیوں کے خلاف اسرائیلی جارحیت پر بات چیت ہوگی ۔
پاکستان، جو ہمیشہ فلسطینی عوام کا بھرپور حامی رہا ہے، اس اجلاس میں اپنے اصولی مؤقف کو دہراتے ہوئے اسرائیل سے تمام مقبوضہ علاقوں سے مکمل انخلا، غزہ پر فوجی کنٹرول کے منصوبے کی واضح مخالفت اور فوری و بلا رکاوٹ انسانی امداد کی فراہمی کا مطالبہ کرے گا ۔
وزیرِ خارجہ فلسطینی عوام کے جائز حقوق کی بحالی پر بھی زور دیں گے، جن میں 1967 سے پہلے کی سرحدوں کے مطابق ایک آزاد اور خودمختار فلسطینی ریاست کا قیام شامل ہے جس کا دارالحکومت القدس الشریف ہو ۔
