ڈیرہ اسماعیل خان: محکمہ ایکسائز نے منشیات کے خلاف بڑی کارروائی کرتے ہوئے کروڑوں روپے مالیت کی 20 کلو آئس برآمد کر لی جبکہ ایک ملزم کو گرفتار کر لیا گیا۔
ایکسائز حکام کے مطابق کارروائی ڈیرہ درابن روڈ پر ڈی آئی خان ٹول پلازہ کے قریب خفیہ اطلاع پر کی گئی۔ ایکسائز انٹیلیجنس سکواڈ نے ایک موٹر کار کو روک کر تلاشی لی جس کے دوران گاڑی کے اسپیئر ٹائر اور خفیہ خانوں سے 20 کلو آئس برآمد کر لی گئی۔
حکام کے مطابق کارروائی صوبائی انچارج ایکسائز انٹیلیجنس سعود خان گنڈاپور اور ای ٹی او اینٹی نارکوٹکس کنٹرول ماجد خان کی نگرانی میں کی گئی، جبکہ ایکسائز انٹیلیجنس سکواڈ کے انسپکٹر سیف اللہ برکی کی قیادت میں ٹیم نے آپریشن کیا۔
کارروائی کے دوران مبینہ ملزم جہانگیر شاہ، سکنہ ضلع قلعہ عبداللہ کو گرفتار کر کے اس کے خلاف تھانہ ایکسائز ڈیرہ اسماعیل خان میں مقدمہ درج کر لیا گیا ہے۔
