ضلع کوہاٹ کی لاچی تحصیل میں پولیس اور سی ٹی ڈی نے مشترکہ کارروائی کرتے ہوئے 6 دہشت گردوں کو ہلاک کر دیا، جبکہ علاقے میں دیگر دہشت گردوں کی تلاش کے لیے سرچ آپریشن تاحال جاری ہے۔
ڈسٹرکٹ پولیس آفیسر (ڈی پی او) شہباز الٰہی کے مطابق پولیس کو خفیہ اطلاع موصول ہوئی تھی جس پر پولیس اور کاؤنٹر ٹیررازم ڈیپارٹمنٹ (سی ٹی ڈی) نے لاچی کے علاقے میں مشترکہ آپریشن کیا۔ کارروائی کے دوران دہشت گردوں اور سیکیورٹی اہلکاروں کے درمیان فائرنگ کا تبادلہ بھی ہوا۔
ڈی پی او کے مطابق شدید مقابلے کے بعد چھ دہشت گرد ہلاک ہو گئے۔ کارروائی کے دوران دہشت گردوں کے قبضے سے اسلحہ اور گولہ بارود بھی برآمد کیا گیا ہے۔
پولیس حکام کا کہنا ہے کہ علاقے میں مزید دہشت گردوں کی موجودگی کے خدشے کے پیش نظر سرچ آپریشن جاری رکھا گیا ہے اور سیکیورٹی فورسز مختلف مقامات پر تلاشی کا عمل جاری رکھے ہوئے ہیں۔
