ایف سی خیبرپختونخوا کی انسداد اسمگلنگ کے حوالے سے کامیاب کارروائیاں سامنے آگئی

فرنٹیئر کور خیبرپختونخوا کی طرف سے گذشتہ ایک ماہ کے دوران انسداد اسمگلنگ کے حوالے سے نہایت ہی کامیاب کارروائیاں کی گئی ہیں۔

چترال، دیر، باجوڑ، مہمند، خیبر، اورکزئی اور سوات میں منشیات، غیرملکی کرنسی، غیر ملکی اشیاء اور اس کے ساتھ اسلحے کی اسمگلنگ کی روک تھام کے سلسلہ میں بہت ہی اہم اقدامات کئے گئے۔جس کے ذریعے بڑی سطح پر کامیاب کاروائیاں کی گئیں ہیں اور 80 ملین روپے مالیت کا غیر قانونی سامان بھی ضبط کر لیاگیا ہے۔

ان میں اشیاء خوردونوش، گھریلو استعمال کے برقی آلات، کپڑا، ٹائر، آٹو پارٹس اور غیر ملکی جدید اسلحہ وغیرہ شامل ہے۔ فرنٹیئر کور خیبرپختونخواہ نارتھ نے افغانستان میں غیرقانونی طور پر سمگل ہونے والا 200 گرام سونا اور غیرملکی کرنسی بھی برآمد کی ہے۔ جس کی مالیت20 ملین روپے کے قریب بنتی ہے۔

انسداد منشیات کی مختلف کاروائیوں میں 221 کلوگرام مختلف اقسام کی منشیات بھی برآمد کی گئی ہے۔ جبکہ ضلع باجوڑ میں 182 کلوگرام منشیات کو برآمد کر کے 9 افراد کو گرفتار بھی کیا گیا ہے۔ جبکہ اس کے ساتھ ہی آٹھ عدد نان کسٹم پیڈ گاڑیوں کو بھی متعلقہ ادارے کے حوالے کیا گیا ہے۔خیبر اور ضلع باجوڑ میں غیرقانونی جدید اسلحہ بھی برآمد کیا گیا ہے۔

فرنٹیئر کور خیبرپختونخوا نارتھ نے مختلف کاروائیوں میں 14 ٹن غیر قانونی یوریا برآمد کر کے ایگریکلچر ڈیپارٹمنٹ کے حوالے کردیا ہے۔ان تمام کاروائیوں میں 17 جرائم پیشہ افراد کو گرفتار کیا گیا ہے۔گرفتاری کے بعد ان کے خلاف قانونی کاروائی کا آغاز بھی کردیا گیا ہے۔