بلوچستان کے ضلع واشک کے علاقے ماشکیل میں مسلح افراد نے دکان پر فائرنگ کی ہے ، فائرنگ کے نتیجے میں پنجاب سے تعلق رکھنے والے 5 مزدو جاں بحق ہو گئے ۔
واشک: پولیس حکام نے بتایا کہ مسلح افراد نے معصوم اور نہتے مزدوروں کو نشانہ بنایا، جاں بحق مزدوروں میں محمد بلال، محمد حسن، محمد قدیر، محسن اور بلال شامل ہیں ۔
واشک پولیس حکام کا کہنا ہے کہ دہشت گردوں کی تلاش کیلئے سیکیورٹی فورسز نے علاقے کو گھیرے میں لے کر سرچ آپریشن شروع کردیا ۔
پولیس کے مطابق فائرنگ سے جاں بحق پانچوں افراد صوبے کے باہر سے آئے ہوئے تھے، ضروری کارروائی کے بعد مقتولین کی لاشیں آبائی علاقوں کو روانہ کی جا رہی ہیں، فائرنگ کے واقعے کی تحقیقات کا آغاز کر دیا گیا ہے ۔
دوسری جانب ترجمان بلوچستان حکومت شاہد رند کا کہنا ہے کہ ماشکیل میں فائرنگ سے 5 افراد کے جاں بحق ہونے کا واقعہ قابل مذمت ہے، حکومت نے واقعے کا نوٹس لیتے ہوئے تحقیقات کا حکم دے دیا ۔
شاہد رند نے کہا کہ بےگناہ شہریوں کے قتل میں ملوث عناصر قانون کی گرفت سے نہیں بچ سکیں گے، حکومت متاثرہ خاندانوں کے غم میں برابر کی شریک ہے ۔
