اٹک: پنجاب کاؤنٹر ٹیررازم ڈیپارٹمنٹ (سی ٹی ڈی) نے اٹک کے سرحدی علاقے میں خفیہ اطلاع پر کارروائی کرتے ہوئے پانچ مبینہ دہشت گردوں کو ہلاک کر دیا۔
سی ٹی ڈی ترجمان کے مطابق دہشت گردوں کی موجودگی کی اطلاع ملنے پر اہلکاروں نے کارروائی کی، جس کے دوران فائرنگ کے تبادلے میں پانچ دہشت گرد مارے گئے۔ ہلاک ہونے والوں کے قبضے سے ایک خودکش جیکٹ، دو دستی بم، اسلحہ اور گولہ بارود برآمد کیا گیا ہے۔
ترجمان کا کہنا ہے کہ ہلاک دہشت گرد پنجاب کے مختلف علاقوں میں دہشت گردی کی منصوبہ بندی کر رہے تھے۔ برآمد ہونے والے اسلحے اور دھماکا خیز مواد کو تحویل میں لے کر مزید تحقیقات شروع کر دی گئی ہیں جبکہ دہشت گردوں کی شناخت کا عمل جاری ہے۔
سی ٹی ڈی کے مطابق صوبے میں امن و امان کی صورتحال برقرار رکھنے اور دہشت گردی کے خطرات کے خاتمے کے لیے مختلف علاقوں میں انٹیلی جنس بنیادوں پر کارروائیاں جاری ہیں۔
