پشاور (ناز پروین) پشاور میں قائم چینی ثقافتی مرکز چائنہ ونڈو نے پاکستان اور چین کے درمیان دوستی کے فروغ میں ایک نئی تاریخ رقم کرتے ہوئے پاکستان کا پہلا ڈریگن بوٹ فیسٹیول کامیابی سے منعقد کیا۔ دریائے کابل کے کنارے منعقد ہونے والے اس منفرد اور تاریخی ایونٹ نے کھیل، ثقافت اور بین الاقوامی دوستی کو ایک ہی پلیٹ فارم پر یکجا کر دیا۔
ڈریگن بوٹ ریس کے مقابلوں میں خیبر پختونخوا پولیس اور چارسدہ کی مشترکہ ٹیم نے پہلی پوزیشن حاصل کی، جبکہ سپورٹس رائٹرز ایسوسی ایشن کی ٹیم دوسرے اور پشاور ہائی کورٹ کی ٹیم تیسرے نمبر پر رہی۔
دریائے کابل کے پانیوں پر پہلی بار چینی ثقافت کے رنگ بکھر گئے، جہاں رنگ برنگی کشتیوں، ڈھول کی تھاپ اور کشتی رانوں کے پُرجوش نعروں نے شائقین کو مسحور کیے رکھا۔ مقابلوں میں سو سے زائد کشتی رانوں نے حصہ لیا جنہیں مختلف ٹیموں میں تقسیم کیا گیا تھا۔ کشتی رانوں نے بہترین ہم آہنگی، مہارت اور ٹیم ورک کا مظاہرہ کرتے ہوئے حاضرین سے بھرپور داد وصول کی۔
تقریب میں وزیراعلیٰ خیبر پختونخوا کے معاون خصوصی برائے ثقافت و سیاحت ملک عدیل اقبال مہمانِ خصوصی تھے۔ اس موقع پر صوبائی وزراء فضل شکور اور اختراللہ جان، اراکین صوبائی اسمبلی، ڈپٹی کمشنر چارسدہ عظمت اللہ وزیر، ایڈیشنل ڈپٹی کمشنر ریسکیو 1122 مس رینا عباسی، ڈائریکٹر کلچر اینڈ ٹورازم مس حلیمہ اقبال سمیت دیگر اعلیٰ حکام اور ہزاروں شہری شریک ہوئے۔
ایونٹ کے لیے ضلعی انتظامیہ نے سکیورٹی اور کشتی رانوں کی حفاظت کے بہترین انتظامات کیے تھے۔ فیڈرل کانسٹیبلری کے بینڈ نے پاک چین دوستی پر مبنی دھنیں پیش کیں جبکہ ایف سی جوانوں نے روایتی خٹک ڈانس کا شاندار مظاہرہ کرکے تقریب کو مزید دلکش بنا دیا۔
فیسٹیول کی ایک نمایاں خصوصیت خواتین کشتی رانوں کی بھرپور شرکت تھی۔ یہ پہلا موقع تھا کہ خواتین کی بڑی تعداد نے ڈریگن بوٹ ریس میں حصہ لیا۔ چینی مہمانوں نے بھی ایونٹ میں خصوصی دلچسپی لی اور اس کے کامیاب انعقاد کو سراہا۔
تقریب کے اختتام پر معاون خصوصی ملک عدیل اقبال نے کامیاب ٹیموں میں ٹرافیاں، میڈلز اور نقد انعامات تقسیم کیے۔ اس موقع پر انہوں نے کہا کہ چائنہ ونڈو پشاور پاک چین دوستی کے فروغ کا ایک اہم مرکز بن چکا ہے۔ ان کے مطابق دریائے کابل میں ڈریگن بوٹ فیسٹیول کا انعقاد نہ صرف صوبے کا مثبت تشخص دنیا کے سامنے اجاگر کرنے کا ذریعہ بنا بلکہ مستقبل میں سیاحت کے فروغ میں بھی اہم کردار ادا کرے گا۔
ملک عدیل اقبال نے پاک چین دوستی کی 75 ویں سالگرہ کے موقع پر اس تاریخی فیسٹیول کے کامیاب انعقاد پر چائنہ ونڈو کی انتظامیہ کو مبارکباد دیتے ہوئے امید ظاہر کی کہ یہ ایونٹ آئندہ برسوں میں باقاعدگی سے منعقد کیا جائے گا۔
چائنہ ونڈو کے ایڈمنسٹریٹر امجد عزیز ملک نے کہا کہ ڈریگن بوٹ فیسٹیول چین کی قدیم ثقافتی روایت کو پاکستان میں متعارف کرانے کے ساتھ ساتھ دونوں ممالک کے عوام کو ایک دوسرے کے مزید قریب لانے کا مؤثر ذریعہ ثابت ہوا ہے۔ انہوں نے کامیاب انعقاد پر ضلعی انتظامیہ، سکیورٹی اداروں اور تمام شریک اداروں کو خراج تحسین پیش کیا اور بتایا کہ مستقبل میں بھی اس فیسٹیول کے انعقاد کی منصوبہ بندی جاری ہے۔
