خیبر پولیس نے تحصیل باڑہ میں کارروائی کرتے ہوئے ایک فرانسیسی خاتون کو بازیاب کر لیا ہے جو مبینہ طور پر گھریلو تشدد کا شکار ہونے کے بعد لاپتا ہو گئی تھیں۔
پولیس کے مطابق سی سی پی او کے احکامات پر کارروائی کرتے ہوئے خاتون کو تحصیل باڑہ سے برآمد کیا گیا۔ پولیس کا کہنا ہے کہ فرانسیسی خاتون 18 جون کو لاپتا ہوئی تھیں اور ابتدائی تحقیقات کے مطابق وہ گھریلو تشدد کا نشانہ بنی تھیں، جس کے بعد انہیں غائب کر دیا گیا تھا۔
پولیس حکام کے مطابق مذکورہ خاتون 2014 میں باڑہ آئی تھیں اور بعد ازاں ایک مقامی شخص سے شادی کے بعد یہیں مقیم تھیں۔
پولیس نے بتایا کہ خاتون کی بحفاظت بازیابی کے بعد واقعے میں ملوث افراد کے خلاف قانونی کارروائی کا آغاز کر دیا گیا ہے، جبکہ مزید تفتیش جاری ہے تاکہ تمام حقائق سامنے لائے جا سکیں۔
