پاکستان فٹ بال لیگ کا آغاز 4 جون کو لاہور میں کیا جائے گا۔
فٹ بال لیگ میں 25 سے زائد غیر ملکی وفود بھی شرکت کریں گے اور اس فٹ بال لیگ کےانگلش لیجنڈ مائیکل اوونز مہمان خصوصی ہوں گے۔افتتاحی تقریب کا اہتمام پی ایف ایل یوکے ہولڈنگ کی جانب سے ہوگا، لیگ کے انعقاد ہونے سے پاکستان میں لاکھوں پاؤنڈ کی سرمایہ کاری متوقع ہے۔
پی ایف ایل یوکے ہولڈنگ کو برطانیہ اور امارات کے سرمایہ کاروں نے قائم کیا ہے جبکہ اس کے ساتھ ہی فرحان احمد جونیجو چیئرمین اور احمد کنور صدر اور سی ای او ہیں۔فرحان احمد جونیجو نے کہا ہے کہ پاکستان میں دنیا کے مقبول ترین کھیل کے فروغ کے لیے بہت سا کام کریں گے، اس لئے پاکستان میں کھیلوں کی صنعت میں ایک بلین پاؤنڈ کی سرمایہ کاری کا منصوبہ کیا گیا ہے،اس کے ساتھ ہی خلیجی ممالک بھی کھیل کے میدان میں سرمایہ لگانے کے لیے خاصی دلچسپی لے رہے ہیں۔
انہوں نے کہا کہ فٹ بال اسٹیڈیمز اور ٹریننگ سینٹرز کے قیام سے کھلاڑیوں کو بین الاقوامی معیار کی تربیت دینے میں آسانی ہوگی، پاکستان کو دنیا کے فٹ بال کے نقشے پر لانا ہدف ہے، پاکستان میں انٹرنیشل کوچز کے ذریعےکھلاڑیوں کی تربیت کا انتظام کیا جائے گا، ساتھ ہی پاکستان کے 100 کھلاڑی لزبن میں عالمی معیار کی ٹریننگ اکیڈمی میں تربیت حاصل کریں گے۔فرحان احمد کے مطابق فٹ بال کا کھیل پوری قوم کو متحد کرنے میں بھی مدد فراہم کرے گا، ساتھ ہی ہم ملک کے پسماندہ ترین علاقوں میں بھی جاکر باصلاحیت بچوں کو تلاش کریں گے۔
