کراچی میں دہشت گردوں کے حملے میں شہید ہونے والے پاکستان رینجرز کے 3 جوانوں کی نماز جنازہ ادا کردی گئی، جنازہ میں وزیرداخلہ محسن نقوی، رینجرز اور پاک فوج کے افسران و جوانوں ، سیاسی حکام اور دیگر لوگوں نے شرکت کی ۔
کراچی: گزشتہ روز رینجرز کیمپ پر حملے میں دہشتگردوں کی فائرنگ سے شہید ہونے والے سندھ رینجرز کے 3 جوانوں کی نماز جنازہ ادا کردی گئی، جس میں وفاقی وزیر داخلہ،گورنر سندھ، وزیراعلیٰ سندھ، ڈی جی رینجرز، شہداء کے لواحقین اور سینئر سول و عسکری حکام نے بڑی تعداد میں شرکت کی ۔
شرکاء نے شہداء کی عظیم قربانیوں کو خراجِ عقیدت پیش کیا اور اہل خانہ سے دلی ہمدردی اور تعزیت کا اظہار کیا، وفاقی وزیر داخلہ محسن نقوی کا کہنا تھا کہ دہشت گردی کا واقعہ انتہائی افسوسناک ہے، جس کا حساب لیا جائےگا ۔
وزیر داخلہ کا مزید کہنا تھا کہ دہشت گردی کرنے والے عناصر کہیں بھی ہوں سکیورٹی فورسز ان کا پیچھا کرکے کیفرکردار تک پہنچائیں گی ۔
اس موقع پر گورنر سندھ نہال ہاشمی نےکہا کہ ہم دہشت گردی کی بھرپور مذمت کرتے ہوئے ملک سے اس کے خاتمےکے لیے جدوجہدکرتے رہیں گے، بھارتی اسپانسرڈ دہشت گردی کو کبھی برداشت نہیں کریں گے اور دہشت گردی کو جڑ سے اکھاڑ کر دم لیں گے ۔
وزیراعلیٰ سندھ مراد علی شاہ نے کہا کہ دہشت گردوں کے ناپاک عزائم کو خاک میں ملاتے ہوئے رینجرز کے بہادر جوانوں نے جام شہادت نوش کیا جن کو سلام پیش کرتے ہیں، ملک سے دہشتگردی کے مکمل خاتمے کے لیے سکیورٹی فورسز کے ساتھ کھڑے ہیں ۔
