پشاور: خیبرپختونخوا کے گورنر فیصل کریم کنڈی نے کراچی میں رینجرز کے ہیڈکوارٹر پر ہونے والے دہشت گرد حملے کی سخت الفاظ میں مذمت کرتے ہوئے کہا ہے کہ پوری قوم اپنی مسلح افواج، رینجرز، پولیس اور دیگر قانون نافذ کرنے والے اداروں کے ساتھ متحد ہو کر کھڑی ہے۔
اپنے بیان میں گورنر فیصل کریم کنڈی نے بروقت کارروائی کرتے ہوئے حملہ ناکام بنانے پر سیکیورٹی فورسز کو خراجِ تحسین پیش کیا۔ انہوں نے کہا کہ ملک کے امن، استحکام اور معاشی مرکز کراچی کو غیر مستحکم کرنے کی ہر سازش کو ناکام بنایا جائے گا۔
انہوں نے مزید کہا کہ دہشت گردوں اور ان کے سہولت کاروں کو قانون کے شکنجے سے بچنے نہیں دیا جائے گا۔ گورنر کا کہنا تھا کہ دہشت گردی کے مکمل خاتمے تک قوم سیکیورٹی اداروں کی ہر ممکن حمایت جاری رکھے گی اور ملک میں امن کے قیام کے لیے تمام اداروں کے ساتھ بھرپور تعاون کرے گی۔
