محکمۂ موسمیات نے خیبر پختونخوا، شمال مشرقی بلوچستان اور ملک کے مختلف علاقوں میں مزید بارشوں کی پیش گوئی کی ہے۔ رپورٹ کے مطابق آئندہ 24 گھنٹوں کے دوران خیبر پختونخوا، جنوبی پنجاب، شمال مشرقی سندھ، اسلام آباد، کشمیر اور گلگت بلتستان کے بعض مقامات پر بارش متوقع ہے۔
محکمۂ موسمیات کے مطابق خیبر پختونخوا کے بیشتر اضلاع میں مطلع ابر آلود رہے گا جبکہ بالائی اور جنوبی علاقوں میں کہیں کہیں موسلادھار بارش اور مقامی ندی نالوں میں طغیانی کا خدشہ ہے۔ پہاڑی علاقوں میں لینڈ سلائیڈنگ کا بھی امکان ظاہر کیا گیا ہے۔
پی ڈی ایم اے خیبر پختونخوا نے 29 جولائی تک موسمی الرٹ جاری کرتے ہوئے متعلقہ اداروں کو کسی بھی ہنگامی صورتحال سے نمٹنے کے لیے الرٹ رہنے اور ضروری انتظامات مکمل رکھنے کی ہدایت کی ہے۔
دوسری جانب مون سون بارشوں کے باعث ملک بھر میں درجہ حرارت میں نمایاں کمی ریکارڈ کی گئی ہے۔ سبی اور نوکنڈی میں زیادہ سے زیادہ درجہ حرارت 43 ڈگری سینٹی گریڈ جبکہ بابوسر میں 19، مالم جبہ میں 21 اور مری میں 23 ڈگری سینٹی گریڈ ریکارڈ کیا گیا۔
