بلوچستان کے مختلف علاقوں میں شدید بارشوں کے باعث برساتی ندی نالوں میں اونچے درجے کا سیلاب ہے۔
محکمہ موسمیات کے مطابق قلعہ سیف اللہ، ہرنائی، دکی، زیارت، سنجاوی، لورالائی، چمن، پشین، قلعہ عبداللہ، کوژک ٹاپ، شیلاباغ، گلستان اور خواجہ عمران میں موسلادھار بارشیں ہوئیں۔ بارشوں کے باعث برساتی ندی نالوں میں اونچے درجے کاسیلاب ہے جب کہ دکی، قلعہ سیف اللہ اور لورالائی میں 6 افراد ریلوں میں بہہ گئے جن کی تلاش جاری ہے۔
ندی نالوں میں سیلاب کی وجہ سے بلوچستان کے مختلف اضلاع میں3 گاڑیاں بہہ گئیں تاہم لوگ محفوظ رہے، جھل مگسی میں مسافر وین سیلاب میں بہہ گئی جس کے بعد وین میں سوار 5 افراد نے درختوں پر پناہ لی جنہیں بعد میں ریسکیو کر لیا گیا۔
