بھارت نے ایشیا کپ ٹی ٹوینٹی ٹورنامنٹ کے فائنل میں پاکستان کو 5 وکٹوں سے شکست دیدی، پاکستان کے 147 رنز کا ہدف بھارت نے 19.4 اوورز میں 5 وکٹوں کے نقصان پر پورا کرکے کامیابی حاصل کی ۔
دبئی میں کھیلے گئے ایشیا کپ کے فائنل میچ میں بھارت نے ٹاس جیت کر پہلے فیلڈنگ کا فیصلہ کیا، پاکستان کی پوری ٹیم 19 اعشاریہ ایک اوور میں 146 رنز پر آؤٹ ہوگئی ۔
پاکستان کے پہلے آؤٹ ہونے والے کھلاڑی صاحبزادہ فرحان تھے جنہوں نے 38 گیندوں پر 57 رنز کی شاندار اننگز کھیلی اور 84 کے مجموعی سکور پر ورون کی گیند پر کیچ آؤٹ ہوئے ۔
ان کے بعد آنے والے صائم ایوب 113 کے مجموعی سکور پر 14 رنز بنا کر کلدیپ کا شکار بنے، دوسری وکٹ گرنے کے بعد پاکستانی بیٹرز کی لائن لگ گئی اور باقی 8 کھلاڑی صرف 33 رنز پر آؤٹ ہوگئے ۔
صائم ایوب کے بعد محمد حارث بھی بغیر کوئی رنز بنائے آوٹ ہوگئے ۔،126 کے سکور پر فخر زمان بھی ورون کی گیند پر کیچ آؤٹ ہوگئے، انہوں نے 35 گیندوں پر 46 رنز بنائے، 131 کے اسکور پر حسین طلعت بھی آؤٹ ہوگئے، وہ صرف ایک رن بناسکے ۔
ان کے بعد سلمان آغا بھی 8 رنز بنا کر آؤٹ ہوگئے، ان کے بعد شاہین آفریدی اور فہیم اشرف بغیر کوئی رن بنائے آؤٹ ہوئے،حارث رؤف اور محمد نواز نے 6،6 رنز بنائے ۔
بھارت کی جانب سے کلدیپ یادیو نے 4 وکٹیں حاصل کیں، جسپرٹ بومرا، ورون چکرورتی اور ایکشر پٹیل نے 2،2 وکٹیں لیں ۔
بھارت نے مقررہ ہدف 19.4 اوورز میں 5 وکٹوں کے نقصان پر پورا کرکے ٹرافی اپنے نام کرلی ، بھارت کی جانب سے سب سے زیادہ تیلک ورما نے 69 ، شیوان دوبے 33 اور سنجو سیمسن نے 24 رنز کی اننگز کھیلی ۔
پاکستان کی جانب سے فہیم اشرف نے 3، شاہین شاہ آفریدی او ابرار احمد نے ایک، ایک وکٹ اپنے نام کی ۔
