ایران کے پاسدارانِ انقلاب (آئی آر جی سی) نے دعویٰ کیا ہے کہ اس کی بحری اور فضائی افواج نے مشترکہ میزائل اور ڈرون کارروائی کے دوران بحرین اور کویت میں امریکی تنصیبات پر 85 مقامات کو نشانہ بنایا۔
پاسدارانِ انقلاب کے جاری کردہ بیان کے مطابق حملوں میں بحرین میں قائم امریکی ففتھ فلیٹ کے اڈے اور کویت کی علی السالم ایئر بیس کو نشانہ بنایا گیا۔
بیان میں کہا گیا ہے کہ یہ کارروائی امریکا کی جانب سے جنگ بندی اور اسلام آباد معاہدے کی مبینہ خلاف ورزی کے جواب میں "ابتدائی ردعمل” کے طور پر کی گئی۔
دوسری جانب بحرین میں ایک بار پھر فضائی خطرے کے سائرن بجا دیے گئے، جس کے بعد وزارت داخلہ نے شہریوں اور رہائشیوں کو فوری طور پر محفوظ مقامات پر منتقل ہونے یا پناہ لینے کی ہدایت جاری کی۔
اس سے قبل ایرانی سرکاری نشریاتی ادارے نے اعلان کیا تھا کہ بحرین میں امریکی اڈوں پر ایرانی میزائل حملوں کا نیا مرحلہ شروع ہو چکا ہے۔
بحرینی حکام نے عوام سے اپیل کی ہے کہ وہ گھروں یا قریبی محفوظ پناہ گاہوں میں رہیں اور سکیورٹی اداروں کی ہدایات پر مکمل عمل کریں۔
