منیلا: نائب وزیرِ اعظم و وزیرِ خارجہ سینیٹر محمد اسحاق ڈار نے 33 ویں آسیان علاقائی فورم کے وزرائے خارجہ کے اجلاس میں شرکت کی۔
اس موقع پر نائب وزیرِ اعظم نے منیلا میں بنگلہ دیش کے وزیرِ خارجہ خلیل الرحمان سے ملاقات کی۔
خلیل الرحمان اقوامِ متحدہ کی جنرل اسمبلی کے 81ویں اجلاس کے منتخب صدر بھی ہیں۔
ترجمان دفتر خارجہ کے مطابق ملاقات میں پاکستان اور بنگلہ دیش کے درمیان تعلقات کی مثبت پیش رفت کا جائزہ لیا گیا۔
ملاقات میں گزشتہ برس نائب وزیرِ اعظم کے بنگلہ دیش کے دورے سے پیدا ہونے والی نئی پیش رفت کا ذکر بھی کیا گیا۔
دونوں رہنماؤں نے دوطرفہ تعلقات کو مزید مضبوط بنانے کے عزم کا اعادہ کیا۔
دونوں وزرائے خارجہ نے دونوں ممالک کے درمیان بڑھتے ہوئے روابط کو سراہتے ہوئے عوامی سطح پر رابطوں میں اضافے اور رواں برس براہِ راست پروازوں کے آغاز کے بعد بہتر رابطہ کاری کو خوش آئند قرار دیا۔
ملاقات میں باہمی دلچسپی کے علاقائی اور بین الاقوامی امور پر بھی تبادلہ خیال کیا گیا۔
دونوں رہنماؤں نے تعلقات کی مثبت رفتار برقرار رکھنے پر بھی اتفاق کیا۔
