ریسکیو حکام نے کہا ہے کہ کرک میں مسافر وین اور ٹرالر میں تصادم کے باعث خاتون اور بچوں سمیت 10 افراد جاں بحق ہوگئے ۔
ریسکیو حکام کے مطابق ٹریفک حادثہ کرک میں انڈس ہائی وے پر لکی غنڈکی کے قریب ٹرالر اور مسافر وین میں ٹکر سے دامنے آیا ، لاشوں اور زخمیوں کو ہسپتال منتقل کر دیا گیا ہے ۔
ریسکیو حکام کے مطابق حادثے میں مسافر وین ٹرالر کے نیچے پھنس گئی، مقامی افراد اور ریسکیو اہلکاروں نے امدادی کارروائیوں میں حصہ لیا اور زخمیوں کو ریسکیو کیا ۔
وزیر اعلیٰ خیبر پختونخوا علی امین گنڈاپور نے کرک میں پیش آنے والے حادثے پر گہرے رنج و غم کا اظہار کیا ہے۔ انہوں نے جاں بحق افراد کے لواحقین سے دلی ہمدردی اور تعزیت کرتے ہوئے مرحومین کی مغفرت اور پسماندگان کے لیے صبر جمیل کی دعا کی ہے ۔
وزیر اعلی نے زخمیوں کی جلد صحتیابی کے لیے نیک خواہشات کا اظہار کرتے ہوئے متعلقہ ضلعی انتظامیہ کو ہدایت دی ہے کہ زخمیوں کو بہترین طبی امداد فراہم کی جائے۔ انہوں نے کہا کہ سوگوار خاندانوں کے غم میں ہم برابر کے شریک ہیں ۔
