اسلام آباد: خیبر نیٹ ورک کے ہیڈ کوارٹرز، اسلام آباد میں میڈیا اداروں اور اکیڈمیہ (تعلیمی اداروں) کے درمیان باہمی تعاون کو فروغ دینے کے لیے ایک اہم مشاورتی نشست کا انعقاد کیا گیا۔
اجلاس کی صدارت سی ای او خیبر ڈیجیٹل و ایگزیکٹو ڈائریکٹر خیبر نیٹ ورک، کیوان حامد راجہ نے کی۔
اجلاس میں اقراء یونیورسٹی اسلام آباد کی نمائندگی کرتے ہوئے ڈین پروفیسر ڈاکٹر اعتزاز احمد، ہیڈ آف ڈیپارٹمنٹ میڈیا اسٹڈیز ڈاکٹر ماجد علی شاہ، اور میڈیا ڈیپارٹمنٹ کے اساتذہ نے شرکت کی۔
نشست کے دوران طلبہ کی عملی تربیت، ورکشاپس، سٹوڈیو بیسڈ لرننگ، انٹرنشپس اور جدید میڈیا پروڈکشن کی سہولیات کے فروغ پر تفصیلی گفتگو کی گئی۔
شرکاء نے اس بات پر زور دیا کہ تعلیمی نصاب کو میڈیا انڈسٹری کی بدلتی ہوئی ضروریات کے مطابق ہم آہنگ کیا جائے اور تعلیمی و پیشہ ورانہ تعاون کو مزید مضبوط بنایا جائے۔
اس موقع پر ‘کیمٹیک’ (خیبر اکیڈمی فار میڈیا اینڈ ٹیکنالوجی) کے کلیدی کردار پر روشنی ڈالی گئی۔
اس اکیڈمی کا بنیادی مقصد میڈیا انڈسٹری اور اکیڈمیہ کو آپس میں جوڑنا اور طلبہ کو جدید ترین عملی تربیت فراہم کرنا ہے۔
تعلیمی اور پیشہ ورانہ روابط کو مستحکم کرنے کے لیے مشترکہ طور پر ‘ایٹم’ (Academia to Media Council – ATOM) کی بنیاد رکھنے پر اتفاق کیا گیا۔
اس کونسل کے پلیٹ فارم پر یونیورسٹیز کے اساتذہ اور میڈیا انڈسٹری سے وابستہ ماہرین مل کر ایسے اقدامات کریں گے جن کے نتیجے میں اعلیٰ تربیت یافتہ اور ماہر طلبہ تیار کیے جا سکیں۔
یہ تربیت یافتہ اور ماہر طلبہ میڈیا انڈسٹری کی پیشہ ورانہ ضروریات کو بخوبی پورا کرنے کی صلاحیت رکھتے ہوں گے۔
یہ اقدام ملک میں میڈیا کی تعلیم اور عملی صحافت و پروڈکشن کے مابین موجود فاصلوں کو مٹانے میں ایک سنگِ میل ثابت ہوگا۔
اس موقع پر فلاحی تنظیم "خود مختار ساوی” کی صدر نشین محترمہ مریم کیوان بھی موجود تھیں۔
