پی ڈی ایم اے خیبرپختونخوا نے صوبے میں حالیہ بارش/آندھی /ژالہ باری اور آسمانی بجلی گرنے کے باعث جانی و مالی نقصانات کی رپورٹ جاری کردی ۔
رپورٹ کے مطابق خیبرپختونخوا میں 27 مئی سے اب تک ہونے والی بارشوں اور تیز آندھی کے باعث حادثات کے نتیجے میں 8 افراد جاں بحق جبکہ 21 افراد زخمی ہوئے ۔
پی ڈی ایم اے کے مطابق جاں بحق افراد میں 5 مرد ،2 خواتین اور ایک بچہ جبکہ زخمیوں میں 10 مرد، 5 خواتین اور 6 بچے شامل ہیں ۔
رپورٹ میں مزید کہا گیا ہے کہ بارش اور آندھی کے باعث مجموعی طور پر 25 گھروں کو نقصان پہنچا جس میں 24 کو جزوی اور ایک گھر مکمل طور پر منہدم ہوا ۔
بارشوں کے دوران حادثات صوبہ کے مختلف اضلاع مردان، صوابی ،پشاور، شانگلہ، سوات، تور غر، مہمند، مانسہرہ اور ہری پور میں پیش آئے ۔
پی ڈی ایم اے کی جانب سے متعلقہ ضلعی انتظامیہ کو متاثرہ خاندان کو فوری طور پر امداد اور زخمیوں کو بہترین طبی سہولیات کی فراہمی یقینی بنانے کی ہدایت ۔
رپورٹ میں کہا گیا ہے کہ بارشوں کا سلسلہ 31 مئ تک جاری رہنے کا امکان ہے، پی ڈی ایم اے نے پہلے ہی سے ضلعی انتظامیہ کو الرٹ رہنے اور پیشگی اقدامات اٹھانے کے لیے مراسلہ جاری کیا ہوا ہے ۔
پی ڈی ایم اے تمام ضلعی انتظامیہ، متعلقہ اور امدادی اداروں کے ساتھ مسلسل رابطے میں ہے، ایمرجنسی اپریشن سنٹر مکمل طور پر فعال ہے، عوام کسی بھی نا خوشگوار واقعے کی اطلاع 1700 پر دیں ۔
