پشاور (شو بز ڈیسک) صوابی سے تعلق رکھنے والے نامور سینئر گلوکار فریدون باچہ کا شمار ریڈیو، اسٹیج اور ٹی وی کے ابتدائی دور کے فنکاروں میں ہوتا ہے۔ گزشتہ روز شینو مینو شو کی ریکارڈنگ کے دوران اخبار خیبر کو دیے گئے ایک خصوصی انٹرویو میں انہوں نے کہا کہ خیبر ٹیلی ویژن نے صوبے بھر کے لیجنڈ فنکاروں کو گمنامی کی اذیت سے بچانے میں بنیادی کردار ادا کیا ہے۔
انہوں نے بتایا کہ خیبر نیٹ ورک گزشتہ اکیس برسوں سے مختلف پروگراموں میں سینئر اور لیجنڈ فنکاروں کو مدعو کر کے انہیں اپنی صلاحیتوں کے اظہار کا موقع دے رہا ہے، جس سے وہ فنکار جو وقت کے ساتھ پس منظر میں چلے گئے تھے، دوبارہ عوامی توجہ حاصل کر رہے ہیں۔
فریدون باچہ نے مزید کہا کہ اگر خیبر ٹیلی ویژن نہ ہوتا تو نوجوان نسل ہم جیسے فنکاروں کی فنی خدمات سے آگاہ نہ ہو پاتی۔ موجودہ دور میں یہ چینل ہمارے لیے شناخت کا واحد اور مضبوط ذریعہ بن چکا ہے۔
