پاکستان ڈائریکٹرز، پروڈیوسرز، رائٹرز اینڈ آرٹس ایسوسی ایشن کے وفد کی ایڈیشنل سیکرٹری کلچر و سیاحت سے ملاقات

پشاور (حسن علی شاہ سے) پاکستان ڈائریکٹرز، پروڈیوسرز، رائٹرز اینڈ آرٹس ایسوسی ایشن کے ایک وفد نے چیئرمین سجاد اورکزی کی قیادت میں ایڈیشنل سیکرٹری کلچر اینڈ ٹورازم رحیم اللہ خان سے ملاقات کی۔ ملاقات کے دوران فنکاروں کی فلاح و بہبود سے متعلق وہ تجاویز زیرِ بحث آئیں جو ایسوسی ایشن کی جانب سے آٹھ ماہ قبل پیش کی گئی تھیں۔
اس موقع پر ایڈیشنل سیکرٹری رحیم اللہ خان نے کہا کہ ان تجاویز پر جلد از جلد عملدرآمد کیا جائے گا اور صوبائی حکومت فنکار برادری کے مسائل کے حل کے لیے سنجیدہ اقدامات اٹھائے گی۔ انہوں نے وفد کی تجاویز کو سراہتے ہوئے مکمل تعاون اور بھرپور حوصلہ افزائی کی یقین دہانی بھی کرائی۔
وفد میں بشریٰ فرخ، تابندہ فرخ، جاوید خلجی، نور رحمان، امجد ہادی، عمر حیات، منظور خان، احمد بخاری اور افشین زمان شامل تھے۔