کوہاٹ ڈویژن میں سیکیورٹی فورسز کی جانب سے شدت پسندوں کے ٹھکانوں پر گن شپ ہیلی کاپٹروں کی شیلنگ کی گئی ہے جس میں 15 دہشتگرد ہلاک ہوگئے اور ان کے کئی ٹھکانے بھی تباہ کردیئے گئے ہیں ۔
کوہاٹ: ریجنل پولیس آفیسر عباس مجید نے کہا ہے کہ ہنگو، اورکزئی اور لوئر کرم کے سرحدی علاقوں میں آپریشن جاری ہے ، آپریشن کے دوران چھپری، کنڈاؤ، شناوڑی، زرگری اور نریاب کے پہاڑی علاقوں میں بڑی کارروائیاں کی گئی ہیں ۔
آر پی او کا کہنا ہے کہ کارروائیوں میں 15 دہشتگرد ہلاک اور متعدد زخمی ہو گئے جبکہ ان کے کئی ٹھکانوں کو تباہ کیا گیا ہے ۔
انہوں نے کہا کہ گن شپ ہیلی کاپٹروں سے دہشتگردوں کو پہاڑوں کی طرف بھاگتے دیکھا گیا، 200 سے زائد آرمی و پولیس اہلکار گرینڈ آپریشن میں شریک ہیں ۔
عباس مجید مروت کا مزید کہنا تھا کہ نو گو ایریا کوہ میدان میں بھی سرچ آپریشن کیا گیا، اس حوالے سے حکام نے علاقہ کلیئر کرنے کا دعویٰ بھی کیا ہے اور کوہ میدان دہشتگردوں سے خالی کرا لیا گیا ۔
