انٹرنیشنل اسلامک یونیورسٹی اسلام آباد میں میڈیا اور اکیڈمیا کے درمیان روابط کو مزید مضبوط بنانے کے لیے ایٹم ایکس ڈائیلاگ کے تحت اہم نشست کا انعقاد کیا گیا۔
نشست کا بنیادی مقصد میڈیا انڈسٹری اور تعلیمی اداروں کے درمیان موجود خلا کو کم کرنا اور طلبہ کو ڈگری کے ساتھ ساتھ عملی اور پیشہ ورانہ تجربے کے مواقع فراہم کرنا تھا۔نشست میں انٹرنیشنل اسلامک یونیورسٹی اسلام آباد کے مختلف شعبہ جات کے سربراہان اور فیکلٹی ممبران نے شرکت کی، جبکہ خیبر اکیڈمی فار میڈیا ٹیکنالوجیز، کام ٹیک کی جانب سے میڈیا انڈسٹری کی موجودہ ضروریات، طلبہ کی عملی تربیت اور اکیڈمیا و انڈسٹری کے درمیان مؤثر رابطے کے حوالے سے تفصیلی گفتگو کی گئی۔
اس موقع پر کیوان حامد راجہ، ایگزیکٹو ڈائریکٹر خیبر نیٹ ورک، چیف ایگزیکٹو آفیسر خیبر ڈیجیٹل اور بانی کام ٹیک نے کام ٹیک کے سفر، اس کے قیام کے مقاصد اور ایٹم کونسل کے وژن سے شرکا کو آگاہ کیا۔نشست میں اس امر پر بھی بات ہوئی کہ یونیورسٹی کے طلبہ کو صرف کتابی اور نظریاتی تعلیم تک محدود رکھنے کے بجائے انہیں براڈکاسٹنگ، میڈیا پروڈکشن اور دیگر عملی شعبوں میں براہِ راست تجربہ کیسے فراہم کیا جا سکتا ہے، تاکہ وہ اپنی ڈگری مکمل کرنے کے ساتھ ساتھ عملی میدان کی ضروریات سے بھی واقف ہوں۔
انٹرنیشنل اسلامک یونیورسٹی اسلام آباد کے شعبہ میڈیا کے سربراہ ڈاکٹر انعام الرحمٰن نے اس اقدام کو سراہتے ہوئے امید ظاہر کی کہ اس طرح کے اقدامات طلبہ کے لیے نہایت مفید ثابت ہوں گے اور انہیں عملی میدان میں آگے بڑھنے کے بہتر مواقع میسر آئیں گے۔
فیکلٹی آف سوشل سائنسز، انٹرنیشنل اسلامک یونیورسٹی اسلام آباد کے ڈین پروفیسر ڈاکٹر منظور خان آفریدی نے بھی کام ٹیک کے اقدام کو وقت کی اہم ضرورت قرار دیتے ہوئے کہا کہ اس طرح کے اشتراک سے طلبہ کو براڈکاسٹنگ اور میڈیا کے عملی ماحول سے تجربہ حاصل کرنے کا موقع ملے گا۔
کیوان حامد راجہ، ایگزیکٹو ڈائریکٹر خیبر نیٹ ورک، چیف ایگزیکٹو آفیسر خیبر ڈیجیٹل اور بانی کام ٹیک کا کہنا تھا کہ نشست کا مقصد یہ جاننا تھا کہ کام ٹیک اور انٹرنیشنل اسلامک یونیورسٹی اسلام آباد کے موجودہ سیٹ اپ اور وسائل کو باہمی طور پر کس طرح استعمال کیا جا سکتا ہے اور طلبہ کے لیے نئے مواقع کیسے پیدا کیے جا سکتے ہیں۔
نشست میں مستقبل میں دونوں اداروں کے درمیان باقاعدہ تعاون کو فروغ دینے اور مفاہمتی یادداشت، یعنی ایم او یو، کے ذریعے مشترکہ اقدامات کو عملی شکل دینے کے امکانات پر بھی تبادلۂ خیال کیا گیا۔
اس تعاون کا مقصد طلبہ کو تعلیمی ڈگری کے ساتھ عملی تربیت، انڈسٹری ایکسپوژر اور جدید میڈیا کے تقاضوں سے ہم آہنگ مواقع فراہم کرنا ہے، تاکہ اکیڈمیا اور میڈیا انڈسٹری کے درمیان موجود خلا کو مؤثر انداز میں کم کیا جا سکے۔
