اسلام آباد: وفاقی وزیر داخلہ محسن نقوی سے امریکہ کے نائب وزیر خارجہ جنوبی و وسطی ایشیائی امور پال کپور نے ملاقات کی۔
اس موقع پر قائم مقام امریکی سفیر نیٹلی بیکر، وزیر مملکت داخلہ طلال چوہدری اور وفاقی سیکرٹری داخلہ بھی موجود تھے۔
ملاقات میں پاک امریکہ تعلقات اور مشرق وسطیٰ کی تازہ ترین صورتحال پر تبادلہ خیال کیا گیا۔
دونوں فریقین نے سکیورٹی، انسداد دہشت گردی اور انسداد منشیات کے شعبوں میں اشتراک بڑھانے پر بھی گفتگو کی۔
وزیر داخلہ محسن نقوی نے کہا کہ صدر ٹرمپ کے دور میں پاک امریکہ تعلقات مزید مضبوط ہوئے اور موجودہ تعلقات باہمی اعتماد اور دوطرفہ تعاون پر مبنی ہیں۔
وفاقی وزیر نے پاکستان اور امریکہ کے درمیان براہِ راست پروازوں کا جلد آغاز کرنے کی خواہش بھی ظاہر کی۔
محسن نقوی نے مزید کہا کہ مشرق وسطیٰ کے تنازعہ کے دیرپا اور پرامن حل کے لیے پاکستان پرامید ہے۔
امریکی نائب وزیر خارجہ نے اس موقع پر خطے میں امن و استحکام کے لیے پاکستان کے کردار کی تعریف کی۔
