لوئر دیر کے علاقے لال قلعہ میں دہشتگردوں کے ٹھکانے پر سیکیورٹی فورسز کی کارروائی کے دوران 10 دہشتگرد ہلاک کردیئے گئے، جبکہ یرغمال بنائے گئے شہریوں کی جانیں بچاتے ہوئے 7 جوان شہید ہوگئے ۔
پاک فوج کے شعبہ تعلقات عامہ کی جانب سے جاری بیان میں کہا گیا ہے کہ لوئر دیر کے علاقے لال قلعہ میں بھارتی پراکسی سے منسلک دہشتگردوں کے ٹھکانے پر آپریشن کیا گیا ۔
آئی ایس پی آر کے مطابق سکیورٹی فورسز نے دہشتگردوں کے ٹھکانے کو مؤثر انداز اور کامیابی کیساتھ نشانہ بنایا اور آپریشن کے دوران فائرنگ کے تبادلے کے بعد بھارتی سپانسرڈ 10 دہشتگرد ہلاک کردیئے گئے ۔
آئی ایس پی آر کا کہنا ہے کہ فائرنگ کے تبادلے میں وطن کے 7 سپوت بہادری سے مقابلہ کرتے ہوئے شہید ہوگئے جن میں نائیک عبدالجلیل، نائیک گل جان، لانس نائیک عظمت اللہ، سپاہی عبدالمالک، سپاہی محمد امجد، سپاہی محمد داؤد اور سپاہی فضل قیوم شامل ہیں ۔
آئی ایس پی آر کے مطابق بہادر سپوت دہشتگردوں کے یرغمال بنائے گئے معصوم شہریوں کی جانیں بچاتے ہوئے شہید ہوئے ۔
آئی ایس پی آر نے بتایاکہ خفیہ اطلاعات کے مطابق ان گھناؤنے اقدامات میں افغان شہری براہِ راست ملوث ہیں اور پاکستان توقع رکھتا ہے کہ عبوری افغان حکومت اپنی ذمہ داریاں پورا کرے گی، توقع ہے افغان حکومت اپنی سرزمین دہشت گردی کیلئے استعمال نہیں ہونے دے گی ۔
