بلوچستان میں منگی ڈیم اور خضدار میں سکیورٹی فورسز کی کارروائیاں جاری ہیں،تازہ کامیاب کارروائی میں 13 دہشتگرد ہلاک ہو گئے، جس کے بعد 5 جولائی سے اب تک 75 دہشتگرد ہلاک ہو چکے ہیں ۔
سکیورٹی ذرائع کی جانب سے بتایا گیا کہ منگی ڈیم پولیس سٹیشن پر مبینہ دہشتگرد حملے کے بعد پاک فوج، ایف سی اور بلوچستان پولیس کی جانب سے ’ آپریشن شعبان‘ جاری ہے ۔
ذرائع کا کہنا تھا کہ دشوار گزار پہاڑی علاقوں میں زمینی اور فضائی کارروائیوں کے ذریعے شدت پسندوں کے خلاف آپریشن کا دائرہ وسیع کیا جا رہا ہے ۔
اِسی طرح 6 اور 7 جولائی کو 26 مبینہ دہشتگرد ہلاک کیے گئے تھے جب کہ گزشتہ 24 گھنٹوں کے دوران مزید 13 دہشتگردوں کی ہلاکت کا دعویٰ کیا گیا ہے، جس کے بعد آپریشن شعبان میں ہلاک ہونے والوں کی مجموعی تعداد 39 بتائی جا رہی ہے ۔
دوسری جانب سکیورٹی ذرائع نے بتایا کہ آج صبح خضدار کے زیدی علاقے میں پولیس سٹیشن پر ہونے والا مبینہ حملہ بھی ناکام بنا دیا گیا ۔
سکیورٹی فورسز کی فوری کارروائی کے نتیجے میں 8 دہشتگردوں کی ہلاکت کی تصدیق کا دعویٰ کیا گیا ہے، جبکہ ہیلی کاپٹر آپریشنز میں مزید 5 سے 6 دہشتگردوں کے مارے جانے کی اطلاعات بھی سامنے آئی ہیں ۔
ذرائع کا کہنا تھا کہ 5 جولائی سے جاری آپریشن ’شعبان‘ اور دیگر انٹیلی جنس بیسڈ آپریشنز کے دوران مجموعی طور پر 75 دہشتگرد ہلاک کیے جا چکے ہیں ۔
