اسلام آباد: وفاقی وزیر برائے منصوبہ بندی احسن اقبال نے کہا ہے کہ پاکستان کی زرعی برآمدات میں اضافہ انتہائی ناگزیر ہے.
وفاقی وزیر کا کہنا تھا کہ زرعی مصنوعات کی برآمدات بڑھانے کیلئے جدید ٹیکنالوجی کا استعمال ضروری ہے۔
اسلام آباد میں ’’زرعی برآمدات سے استفادہ، خطرات اور مواقع‘‘ کے موضوع پر راؤنڈ ٹیبل کانفرنس سے احسن اقبال نے خطاب کیا۔
احسن اقبال نے کہا کہ برآمدات پر مبنی معیشت کا فروغ وقت کی اہم ضرورت ہے۔
عالمی منڈیوں تک پاکستان کی مصنوعات کی رسائی کیلئے اقدامات ضروری ہیں۔
وفاقی وزیر نے کہا کہ زرعی برآمدات بڑھانے سے ملکی معیشت اور کسانوں کی آمدن میں اضافہ ممکن ہے۔
زرعی شعبے میں ویلیو ایڈیشن اور جدید ٹیکنالوجی کا استعمال بڑھانا ہوگا۔
احسن اقبال کے مطابق پاکستان کو صرف زرعی پیداوار بڑھانے پر نہیں بلکہ برآمدی معیار اور عالمی منڈی میں مسابقت پر بھی توجہ دینا ہوگی۔
موسمیاتی تبدیلی، پانی کی کمی اور پیداوار کے معیار جیسے چیلنجز سے نمٹنے کیلئے تحقیق، جدت اور جدید طریقہ ہائے پیداوار کو فروغ دینا ہوگا۔
