ترجمان دفتر خارجہ طاہر اندرابی نے کہا ہے کہ پاکستان افغانستان میں انسانی بحران سے نمٹنے کے لیے امدادی کوششیں جاری رکھے ہوئے ہے اور اب تک 45 امدادی ٹرکوں کی فراہمی میں معاونت کر چکا ہے، تاہم افغان حکام ان ٹرکوں کو داخلے کی اجازت نہیں دے رہے۔
ہفتہ وار پریس بریفنگ کے دوران ترجمان نے کہا کہ پاکستان نے کبھی بھی افغانستان جانے والے انسانی امداد کے قافلوں کو نہیں روکا اور وہ افغان عوام کی انسانی ضروریات پوری کرنے کے لیے اپنی ذمہ داریاں ادا کرتا رہے گا۔
انہوں نے کہا کہ جب تک افغانستان دہشت گردوں اور دہشت گردی کی پشت پناہی ختم نہیں کرتا، دونوں ممالک کے درمیان اعتماد کی فضا بحال نہیں ہو سکتی۔
ترجمان دفتر خارجہ نے مشرقِ وسطیٰ کی صورتحال پر بھی تشویش کا اظہار کرتے ہوئے کہا کہ پاکستان امریکہ اور ایران کے درمیان حالیہ کشیدگی پر گہری نظر رکھے ہوئے ہے۔ انہوں نے زور دیا کہ اسلام آباد مفاہمتی یادداشت پر عمل درآمد خطے میں امن و استحکام کے لیے ضروری ہے۔
