اسلام آباد: پاکستان نے فضائی حدود کی خلاف ورزی پر ایران کے ساتھ سفارتی تعلقات منقطع کردیے ہیں۔ جرات مندانہ فیصلے کے تحت پاکستان نے ایران سے اپنا سفیر واپس بلا لیا ہے جبکہ ایرانی سفیر کو ملک بدر کر دیا ہے۔
اس بات کا اعلان ترجمان دفتر خارجہ ممتاز زہرا بلوچ نے پریس کانفرنس کرتے ہوئے کیا۔ ترجمان کے مطابق پاکستان نے تہران میں موجود اپنے سفیر کو واپس بلالیا ہے اور ایران کے ساتھ تمام سفارتی دوروں کو منسوخ کر دیا گیا ہے۔ترجمان دفتر خارجہ نے بتایا کہ پاکستان نے اپنے فیصلے سے ایرانی حکومت کو آگاہ کردیا ہے۔
گزشتہ روز ایرانی گارڈز نے پاکستان کی فضائی حدود کی خلاف ورزی کرتے ہوئے بلوچستان میں میزائل اور ڈرون حملےکیے تھے۔ ایرانی میڈیا کے مطابق ایرانی سکیورٹی فورسز کی جانب سے پاکستان کے صوبے بلوچستان میں جیش العدل نامی تنظیم کے دو ٹھکانوں پر میزائل اور ڈرون حملے کیے گئے۔
پاکستانی وزارت خارجہ کے مطابق پاکستانی فضائی حدود میں ایرانی حملے کے نتیجے میں دو معصوم بچے جاں بحق اور تین بچیاں زخمی ہوئی تھیں۔ آج دفتر خارجہ نے ایران کی جانب سے پاکستان کی فضائی حدود کی خلاف ورزی کرنےکی شدید مذمت کی ہے۔
