اسلام آباد: وزیراعظم کے معاونِ خصوصی ہارون اختر خان سے ازبکستان کے ناوئی ریجن کے گورنر نورمت ترسنوف نے ملاقات کی، جس میں دونوں ممالک کے درمیان مختلف شعبوں میں تعاون بڑھانے پر اتفاق کیا گیا۔
ملاقات میں پاکستان میں ازبکستان کے سفیر علی شیر تختایف، سیکرٹری صنعت و پیداوار اور فوڈ سیکرٹری سیف انجم سمیت اعلیٰ حکام بھی موجود تھے۔ اس موقع پر ہارون اختر خان نے ازبک وفد کا پرتپاک استقبال کیا اور پاکستانی عوام کی جانب سے خیرسگالی کے جذبات کا اظہار کیا۔
گفتگو کے دوران پاکستان سے ازبکستان کو زندہ جانوروں کی برآمد کی تجویز پر غور کیا گیا۔ اس کے علاوہ ادویات، لیدر اور دیگر صنعتی شعبوں میں تعاون بڑھانے پر بھی اتفاق کیا گیا۔ دونوں ممالک نے بی ٹو بی روابط کو فروغ دینے، گوشت کی برآمدات بڑھانے اور دوطرفہ تجارت کو مستحکم کرنے کی اہمیت پر زور دیا۔
ہارون اختر خان نے بتایا کہ وہ جلد ایک اعلیٰ سطحی وفد کے ہمراہ ازبکستان کا دورہ کریں گے، جہاں مزید تجارتی معاہدوں کو حتمی شکل دی جائے گی۔ ملاقات کے اختتام پر انہوں نے ازبک گورنر کو یادگاری شیلڈ پیش کی، جبکہ دونوں جانب سے ایک دوسرے کے عوام اور قیادت کے لیے نیک تمناؤں کا اظہار کیا گیا۔
