مشرقِ وسطیٰ میں پاکستان کی حالیہ ثالثی کی کوششیں قابل ستائش ہیں، پولینڈ کے سفیر کا تقریب سے خطاب

پاکستان میں پولینڈ کے سفیر ماجی پسارسکی  نے عالمی حالات کی بے یقینی کے باوجود پاکستان اور پولینڈ تعلقات کی مضبوطی کو سراہتے ہوئے کہا ہے کہ دونوں ممالک بین الاقوامی قانون، حقِ خودارادیت اور امن کے مشترکہ اصولوں کے پابند ہیں، اور یوکرین تنازع، غزہ کی صورتحال اور علاقائی دہشت گردی جیسے مسائل پر مشترکہ مؤقف رکھتے ہیں ، انہوں نے مشرقِ وسطیٰ میں پاکستان کی حالیہ ثالثی کوششوں کو بھی سراہا اور “اسلام آباد پروسس” کو کشیدگی میں کمی کا باعث قرار دیا ۔

اسلام آباد میں پولینڈ کے قومی دن کی تقریب سے خطاب کرتے ہوئے پولینڈ کے سفیر ماجی پسارسکی نے اس موقع کو ممکنہ طور پر اسلام آباد میں اپنی آخری تقاریر میں سے ایک قرار دیا، اور کہا کہ  پاکستان میں میری تعیناتی ایک معمول کی ذمہ داری سے کہیں بڑھ کر تھی، جو منفرد لمحات، غیر معمولی ملاقاتوں اور غیر متوقع تجربات” سے بھرپور رہی، اس تعیناتی نے میری ذاتی اور پیشہ ورانہ زندگی کو گہرے طور پر متاثر کیا ۔

انہوں نے مشرقِ وسطیٰ میں پاکستان کی حالیہ ثالثی کوششوں کو بھی سراہا اور “اسلام آباد پروسس” کو کشیدگی میں کمی کا باعث قرار دیا ۔

ماجی پِسارسکی نے سیاسی روابط میں پیش رفت کو ایک اہم کامیابی قرار دیا، جس کی مثال اکتوبر 2025 میں پولینڈ کے نائب وزیرِاعظم اور وزیرِ خارجہ رادوسواف سِکورسکی کے کامیاب دورۂ پاکستان سے ملتی ہے ۔

انہوں نے صدر آصف علی زرداری، وزیرِاعظم شہباز شریف اور نائب وزیرِاعظم سینیٹر اسحاق ڈار کے ساتھ ہونے والی ملاقاتوں کو نتیجہ خیز قرار دیا، جن سے دوطرفہ تعاون کے ایک نئے باب کا آغاز ہوا۔ سکیورٹی تعاون کو بھی فروغ ملا، خاص طور پر پاکستان کے وزیرِ داخلہ محسن نقوی کے دورۂ پولینڈ کے ذریعے ۔

ان کا کہنا تھا کہ معاشی میدان میں دوطرفہ تجارت گزشتہ سال 1.3 ارب ڈالر سے تجاوز کر گئی، جس میں پاکستان کے GSP+ اسٹیٹس نے اہم کردار ادا کیا، پولینڈ کے سفیر نے پولینڈ کی سرمایہ کاری، خصوصاً اورلین گروپ کے سندھ میں 500 ملین ڈالر کے گیس تلاش منصوبوں پر اطمینان کا اظہار کیا، جن سے مقامی سطح پر گیس کی پیداوار، ٹیکنالوجی کی منتقلی اور تربیت کے مواقع فراہم ہوئے۔ فِن ٹیک اور گرین ٹیکنالوجی کے شعبوں میں بھی نئی مواقع تلاش کیے جا رہے ہیں ۔

انہوں نے اپنی اہلیہ، پولینڈ کے سفارت خانے کی ٹیم، مقامی عملے اور پاکستانی دوستوں کا شکریہ ادا کیا، جنہوں نے اس سفر کو یادگار بنایا، تقریب کا اختتام پاک-پولینڈ دوستی کے تسلسل کے پُرجوش عزم کے ساتھ ہوا ۔