وزیراعلی خیبرپختونخوا علی امین گنڈاپور کے صوابدیدی فنڈ میں رواں مالی سال کے دوران 45 کروڑ روپے کا اضافہ ہوگیا، وزیراعلی نے رواں مالی سال میں 5 کروڑ کے بجائے 50 کروڑ روپے کے صوابدیدی فنڈ خرچ کر ڈالے ، دوسری جانب صوبے کی اپوزیشن جماعتوں نے معاملہ عدالت لے جانے کا اعلان کیا ہے ۔
دستاویزات کے مطابق آئندہ مالی سال کے لیے وزیراعلیٰ کے صوابدیدی فنڈ کی مد میں 50 کروڑ مختص کیے گئے ہیں ۔
دستیاب دستاویز کے مطابق وزیراعلی علی امین گنڈاپور کے صوابدیدی فنڈز میں رواں مالی سال کے دوران 10 گنا اضافہ دیکھا گیا ہے، وزیراعلی خیبرپختونخوا نے رواں مالی سال کے لیے مختص 5 کروڑ روپے کے بجائے 50 کروڑ روپے مالیت کے صوابدیدی فنڈز خرچ کر ڈالے ۔
دستاویز میں کہا گیا ہے کہ آئندہ مالی سال کے لیے وزیراعلی کے صوابدیدی فنڈز کی مد میں 50 کروڑ مختص کیے گئے ہیں، وزیراعلی کے لیے رواں مالی سال میں فقط 5 کروڑ روپے کے صوابدیدی فنڈز مختص کیے گئے تھے ۔
رواں مالی سال کے دوران تحائف اور تفریح کی مد میں بھی 11 کروڑ خرچ ہوگئے، وزیراعلیٰ نے رواں مالی سال کے دوران تحائف و تفریح کی مد میں 8 کروڑ 50 لاکھ زائد خرچ کیے، سیکرٹ فنڈز کی مد میں 20 کروڑ خرچ کیے ۔
دوسری جانب خیبر پختونخوا کی اپوزیشن جماعتوں نے ترقیاتی فنڈز کو وزیراعلی کی صوابدید پر استعمال کو غیر منصفانہ قرار دیتے ہوئے اسے عدالت میں چیلنچ کرنے کا فیصلہ کیا ہے جبکہ صوبے میں برسر اقتدار تحریک انصاف نے اس کا دفاع کیا ہے اور کہتے ہیں کہ صوابدیدی فنڈ کا استعمال وزیراعلی کا حق ہے ۔
