وزیراعظم شہباز شریف نے کہا ہے کہ معرکۂ حق میں ذلت آمیز شکست کے بعد بھارت اب اپنے پراکسی عناصر کے ذریعے دہشت گردی کی کوشش کرے گا، تاہم ان کا انجام بھی بھارتی طیاروں جیسا ہی ہوگا۔ انہوں نے کہا کہ عظیم قربانیوں کے نتیجے میں ایک دن کشمیر ضرور آزادی حاصل کرے گا۔
یہ باتیں وزیراعظم نے آزاد کشمیر قانون ساز اسمبلی کے اجلاس سے خطاب کرتے ہوئے کہیں۔ وزیراعظم نے کہا کہ وہ پاکستانی عوام اور حکومت کی جانب سے کشمیریوں کے ساتھ یکجہتی کے اظہار کے لیے موجود ہیں اور سابق صدر آزاد کشمیر بیرسٹر سلطان محمود کے انتقال پر گہرے دکھ کا اظہار کیا۔
انہوں نے کہا کہ کشمیر کی آزادی کے لیے جدوجہد کرنے والے ہر فرد کو سلامِ عقیدت پیش کرتے ہیں۔ کشمیری اپنے بچوں کی قربانیاں دے سکتے ہیں مگر آزادی کی جدوجہد سے پیچھے نہیں ہٹیں گے۔
وزیراعظم نے واضح کیا کہ بابائے قوم نے کشمیر کو پاکستان کی شہ رگ قرار دیا، جو پاکستان کی خارجہ پالیسی کی بنیاد ہے۔ مسئلہ کشمیر کشمیری عوام کی خواہشات اور اقوام متحدہ کی سلامتی کونسل کی قراردادوں کے مطابق حل ہونا چاہیے۔
انہوں نے دوٹوک انداز میں کہا کہ جب تک کشمیریوں کو حقِ خود ارادیت نہیں ملتا، پاکستان ان کی حمایت جاری رکھے گا۔
