اسلام آباد:سمیڈا اور وزیراعظم یوتھ پروگرام کے درمیان مفاہمتی یادداشت پر دستخط کی تقریب منعقد ہوئی۔
تقریب میں وزیراعظم کے مشیر و وفاقی وزیر صنعت و پیداوار ہارون اختر خان اور چیئرمین وزیراعظم یوتھ پروگرام رانا مشہود خان نے شرکت کی۔
ہارون اختر خان نے کہا کہ مفاہمتی یادداشت کا مقصد نوجوان کاروباری افراد اور چھوٹے و درمیانے کاروباروں تک مالی اور کاروباری سہولیات کی رسائی بڑھانا ہے۔
سمیڈا وزیراعظم یوتھ بزنس اینڈ ایگریکلچر لون سکیم سے متعلق آگاہی فراہم کرے گا۔
سمیڈا تربیتی پروگرامز کے ذریعے نوجوانوں کو قرض کے حصول کے لیے اہلیت، دستاویزات اور درخواست جمع کرانے کے طریقہ کار سے آگاہ کرے گا۔
وفاقی وزیر نے کہا کہ سمیڈا نوجوانوں کو بزنس پلان، پری فیزیبلٹی سٹڈیز، مالیاتی ٹولز اور دیگر کاروباری رہنمائی فراہم کرے گا۔
ڈیجیٹل یوتھ ہب کے ذریعے سمیڈا کے کاروباری وسائل اور تربیتی مواد نوجوانوں تک پہنچایا جائے گا۔
ان کا کہنا تھا کہ وزیراعظم یوتھ پروگرام اور سمیڈا پسماندہ علاقوں اور خواتین کاروباری افراد تک مالی سہولیات کی رسائی بڑھائیں گے۔
دونوں اداروں کے درمیان رابطے اور عملدرآمد کی نگرانی کے لیے فوکل ٹیمیں تشکیل دی جائیں گی اور سہ ماہی جائزہ اجلاس منعقد کیے جائیں گے۔
