صدر مملکت آصف علی زرداری اور وزیراعظم شہبازشریف نے خضدار میں سکول بس پر حملے کی شدید مذمت کی ہے ، انہوں نے اس انسانیت سوز اور گھناؤنے جرم پر گہری تشویش کا اظہار کرتے ہوئے شہدا کے لواحقین سے تعزیت کا اظہار کیا ہے ۔
صدر مملکت نے کہا کہ سکول کے معصوم بچوں پر حملہ تعلیم اور انسانیت کے خلاف ہے اور بھارت پاکستان کے خلاف دہشتگردوں کی حمایت میں ملوث ہے ۔
انہوں نے کہا کہ بھارت کے حمایت یافتہ دہشتگردوں کا قلع قمع کیا جائے گا اور بھارتی سرپرستی میں ہونے والی دہشتگردی کو عالمی سطح پر بے نقاب کیا جائے گا ۔
وزیراعظم نے بھی خضدار میں اسکول بس دھماکے کی شدید مذمت کرتے ہوئے بچوں اور اساتذہ کی شہادت پر رنج و غم کا اظہار کیا ۔
انہوں نے بچوں کے والدین کے ساتھ ہمدردی کا اظہار کیا اور ذمہ داروں کے فوری تعین اور انہیں قرار واقعی سزا دلوانے کی ہدایت دی۔ وزیراعظم نے زخمیوں کو فوری طبی امداد فراہم کرنے کا بھی حکم دیا ۔
وزیراعظم نے کہا کہ بھارتی سرپرستی میں دہشتگردوں نے بزدلانہ حملہ کیا ہے جو تعلیم دشمنی کا منہ بولتا ثبوت ہے۔ دہشتگردوں نے اس اسکول بس پر حملہ کرکے درندگی کی تمام حدیں پار کر دی ہیں ۔
انہوں نے کہا کہ بھارتی سرپرستی میں پلنے والے دہشتگردوں کو انجام تک پہنچا دیا جائے گا اور دہشتگردوں کے ناپاک عزائم کو خاک میں ملانے کے لیے کوئی کسر نہیں چھوڑی جائے گی ۔
دہشتگردوں کے ہاتھوں بچوں کو نشانہ بنانے والوں کو کیفر کردار تک پہنچایا جائے گا، یہ فیصلہ حکومت کی عزم کا مظہر ہے ۔
