اقوام متحدہ کی جنرل اسمبلی کے 81ویں اجلاس کے موقع پر وزیراعظم شہباز شریف کی ایرانی صدر مسعود پزشکیان سے ملاقات ہوئی،دونوں رہنماوں کے درمیان پاک ایران تعلقات اور خطے کی صورتحال سمیت اہم امور پر تبادلہ خیال کیا گیا، اس موقع پر دونوں فریقین نے قریبی روابط برقرار رکھنے پر اتفاق کیا ۔
نيويارک: ملاقات میں ایرانی وزیر خارجہ عباس عراقچی، نائب وزیراعظم و وزیر خارجہ اسحاق ڈار، وزیر دفاع خواجہ محمد آصف اور معاون خصوصی طارق فاطمی بھی شریک تھے ۔
دونوں رہنماؤں کے درمیان ملاقات ایسے وقت میں ہوئی ہے جب پاکستان امریکہ اور ایران کے درمیان کشیدگی کم کرنے اور مذاکرات کی بحالی کے لیے سفارتی کوششیں جاری رکھے ہوئے ہے ۔
وزیراعظم شہباز شریف نے بھی اقوام متحدہ میں گفتگو کے دوران پاکستان کے ثالثی کردار اور کشیدگی میں کمی کے لیے کوششیں جاری رکھنے کے عزم کا اظہار کیا ہے ۔
اس سے قبل نائب وزیراعظم و وزیر خارجہ اسحاق ڈار نے ایرانی وزیر خارجہ عباس عراقچی سے ملاقات کی، جس میں دوطرفہ تعلقات اور علاقائی صورتحال پر تبادلہ خیال کیا گیا ۔
ملاقات میں دونوں رہنماؤں نے علاقائی و عالمی پیش رفت پر بھی اپنے خیالات کا اظہار کیا، جبکہ اسحاق ڈار نے علاقائی امن و استحکام کے فروغ کے لیے مذاکرات، سفارت کاری اور مسلسل روابط کی اہمیت پر زور دیا ۔
