وزیراعلیٰ خیبر پختونخوا سہیل آفریدی نے لانگ مارچ موخر کرنے کا اعلان کرتے ہوئے کہا کہ ہمارا لانگ مارچ 4 اکتوبر کو پشاور سے روانہ ہوگا، اس حوالے سے پارٹی کی سیاسی کمیٹی نے متفقہ فیصلہ کیا ۔
پشاور میں پریس کانفرنس سے خطاب کرتے ہوئے وزیراعلیٰ خیبر پختونخوا سہیل آفریدی نے کہا ہے کہ چاہے راستے میں کتنی ہی رکاوٹیں کیوں نہ کھڑی کردی جائیں، لانگ مارچ ہر صورت ہوگا اور پرامن ہوگا ۔
انہوں نے الزام لگایا کہ دوسرے صوبوں سے آنے والے سرکاری اہلکار خیبر پختونخوا کے سرکاری اہلکاروں سے الجھ رہے ہیں۔ جس سیکرٹریٹ سے صوبہ چلتا ہے اسے مبینہ جعلی تھریٹ کے نام پر بند کردیا گیا ہے ۔
اس سے قبل پاکستان تحریک انصاف کی سیاسی کمیٹی کا اجلاس ہوا جس میں لانگ مارچ سے متعلق رہنماوں نے اپنی تجاویز پیش کیں ۔
ذرائع کے مطابق اجلاس میں اتفاق ہوا ہے کہ لانگ مارچ کو موخر کردیا جائے، اجلاس کو بتایا گیا کہ پشاور ریجن کے قافلے 4 اکتوبر کو صوابی پہنچیں گے، اور پھر لانگ مارچ کا مرکزی قافلہ صوابی سے اسلام آباد کی جانب روانہ ہوگا ۔
