پشاور: ایس پی صدر کی ہدایات اور ڈی ایس پی رحمان بابا کی نگرانی میں ایس ایچ او تھانہ رحمان بابا کی سربراہی میں بلال کالونی اور شمروز آباد کے علاقوں میں سرچ اینڈ اسٹرائیک آپریشن کیا گیا، جس کے دوران متعدد جرائم پیشہ عناصر کے خلاف کارروائیاں عمل میں لائی گئیں۔
پولیس کے مطابق آپریشن کے دوران 23 گھروں کی تلاشی لی گئی جبکہ دفعہ 302/34 پی پی سی کے مقدمے میں مطلوب ایک اشتہاری ملزم کو گرفتار کیا گیا۔ اسی طرح دفعہ 381-A پی پی سی اور دفعہ 392 پی پی سی کے مقدمات میں مطلوب دو ملزمان کو بھی حراست میں لیا گیا۔ کارروائی کے دوران ایک مسروقہ موٹر سائیکل اور 5 ہزار روپے نقد رقم بھی برآمد کی گئی۔
پولیس نے غیر قانونی اسلحہ رکھنے پر دفعہ 15AA کے تحت مقدمہ درج کرتے ہوئے ایک ملزم کو گرفتار کر کے اس کے قبضے سے ایک پستول اور 15 کارتوس برآمد کیے۔ جبکہ ایک اور کارروائی میں ایس ایم جی برآمد ہونے پر دفعہ 19(1)3A کے تحت مقدمہ درج کرکے ملزم کو گرفتار کیا گیا۔
منشیات فروشوں کے خلاف کارروائی کے دوران ایک ملزم کے قبضے سے 25 گرام چرس برآمد ہوئی، جس پر دفعہ 15AA کے تحت مقدمہ درج کر لیا گیا۔
سرچ آپریشن کے دوران امن و امان برقرار رکھنے کے لیے دفعہ 107/151 کے تحت 4 افراد جبکہ دفعہ 55/109 کے تحت 6 افراد کے خلاف قانونی کارروائی عمل میں لائی گئی۔ علاوہ ازیں 30 موٹر سائیکلوں کی چیکنگ و کلیئرنس کی گئی اور ٹینٹڈ شیشوں والی 6 گاڑیوں کے خلاف بھی کارروائی کی گئی۔
پولیس حکام کا کہنا ہے کہ جرائم پیشہ عناصر کے خلاف سرچ اینڈ اسٹرائیک آپریشنز کا سلسلہ آئندہ بھی جاری رہے گا تاکہ شہریوں کے جان و مال کا تحفظ یقینی بنایا جا سکے اور علاقے میں امن و امان کی فضا برقرار رہے۔
