نیشنل ڈیزاسٹر مینجمنٹ اتھارٹی (این ڈی ایم اے) نے خیبرپختونخوا کے مختلف اضلاع میں 7 جولائی سے 10 جولائی تک گرج چمک کے ساتھ بارشوں کی پیش گوئی کرتے ہوئے شہریوں کو احتیاطی تدابیر اختیار کرنے کی ہدایت کی ہے۔
این ڈی ایم اے کی جانب سے جاری بیان کے مطابق بارش برسانے والا موسمی نظام منگل کے روز پاکستان کے شمالی علاقوں میں داخل ہوگا، جس کے اثرات کے باعث خیبرپختونخوا کے بالائی اضلاع میں گرج چمک کے ساتھ بارش کا امکان ہے۔
ترجمان این ڈی ایم اے کے مطابق بارشوں کے نتیجے میں ندی نالوں اور برساتی گزرگاہوں میں پانی کی سطح بڑھ سکتی ہے، تاہم موجودہ صورتحال کے مطابق بڑے دریاؤں میں شدید سیلاب کا فوری خطرہ نہیں ہے۔
ادارے نے خبردار کیا ہے کہ پہاڑی علاقوں میں مسلسل بارشوں کے باعث لینڈ سلائیڈنگ کا خدشہ موجود ہے، جس کے پیش نظر مقامی انتظامیہ اور متعلقہ اداروں کو الرٹ رہنے کی ہدایت کی گئی ہے۔
این ڈی ایم اے نے شہریوں سے اپیل کی ہے کہ خراب موسم کے دوران غیر ضروری سفر سے گریز کریں، احتیاطی تدابیر اختیار کریں اور متعلقہ اداروں کی ہدایات پر عمل کریں۔
