پشاور (خصوصی رپورٹر) — تحریک پاکستان کے صوبائی رہنما معظم امیر ایڈوکیٹ نے کہا ہے کہ برصغیر کے مسلمانوں نے قیامِ پاکستان کے لیے بے شمار جانی اور مالی قربانیاں دیں اور قائداعظم محمد علی جناح کی قیادت میں آزادی کی جدوجہد میں بھرپور کردار ادا کیا۔
انہوں نے کہا کہ تحریک پاکستان کے دوران رہنماؤں نے برطانوی سامراج اور ہندو قیادت کے خلاف ڈٹ کر مقابلہ کیا، جو ہماری تاریخ کا ایک روشن اور ناقابلِ فراموش باب ہے۔ تاہم بدقسمتی سے قیام پاکستان کے بنیادی مقاصد آج تک مکمل طور پر حاصل نہیں کیے جا سکے۔
معظم امیر ایڈوکیٹ کا کہنا تھا کہ ملک میں جمہوریت کے دعویداروں نے ہی جمہوری اقدار کو کمزور کرنے میں کردار ادا کیا، جس کے باعث حقیقی جمہوریت مضبوط نہ ہو سکی۔ انہوں نے سوال اٹھایا کہ کیا ہم آج یہ کہہ سکتے ہیں کہ یہ وہی پاکستان ہے جس کا خواب قائداعظم نے دیکھا تھا؟
ان کا کہنا تھا کہ قوم کو اپنی تاریخ اور قربانیوں کو یاد رکھنا چاہیے، کیونکہ جب ایک مضبوط قوم وجود میں آتی ہے تو ہی مضبوط ریاست قائم ہوتی ہے۔ انہوں نے افسوس کا اظہار کرتے ہوئے کہا کہ آج قوم متحد ہونے کے بجائے ایک ہجوم میں تبدیل ہوتی دکھائی دے رہی ہے، جس پر سنجیدگی سے غور کرنے کی ضرورت ہے۔
