پشاور:ڈپٹی سپیکر ثریا بی بی کی صدارت میں خیبر پختونخوا اسمبلی کا مختصر اجلاس ہوا جس میں 14 اراکین نے شرکت کی ۔ اجلاس کے دوران وزیر قانون آفتاب عالم نے مقبوضہ کشمیر کے عوام سے اظہار یکجہتی کی قرارداد پیش کی۔
قرارداد میں کہا گیا ہے کہ ہندوستان کی جانب سے مقبوضہ کشمیر میں انسانی حقوق کی خلاف ورزیاں کی جا رہی ہیں، 35 سالوں سے حق خودارادیت مانگنے کی پاداش میں ایک لاکھ کشمیری مسلمانوں کو شہید کیا گیا۔
قرارداد میں مطالبہ کیا گیا ہے کہ عالمی برادری بھارت کی جانب سے انسانی حقوق کی خلاف ورزیوں کا نوٹس لے، ہم مقبوضہ کشمیر کے مسلمانوں کے ساتھ کھڑے ہیں اور ہندوستان کی جارحیت کا مقابلہ کریں گے۔
قرارداد کے متن میں یہ بھی کہا گیا ہے ایوان مقبوضہ کشمیر کے مسلمانوں کی جدوجہد قربانیوں کا سلام پیش کرتا ہے، ہندوستان کی 9 لاکھ فوج کی تعیناتی اور کالے قوانین کے ذریعے کشمیریوں کے قتل عام کی مذمت کی جاتی ہے۔
قرارداد کے مطابق 9 لاکھ غاصب بھارتی فوج نے کشمیریوں کو یرغمال بنایا ہوا ہے،قرارداد کی منظوری کے بعد خیبرپختونخوا اسمبلی کا اجلاس کل سہ پہر 3 بجے تک ملتوی کر دیا گیا۔
